мустәмликичилик инсанийәткә қарши өткүзүлгән җинайәттур

фирансийә пирезиденти макрон 1957-йили фирансийә армийәсиниң алҗирийәдә мустәмликичиликкә қарши қозғалған күрәшни қоллиған маврис авдин исимлик кишини өлтүргән вәқәниң җавабкарлиқини қобул қилидиғанлиқлирини елан қилди.

мустәмликичилик инсанийәткә қарши өткүзүлгән җинайәттур

түркийә авази радийоси хәвири: фирансийә елси сарийи алҗирийәниң мустәмликичиликкә қарши күриши тоғрисида байанат елан қилди. байанатта, алҗирийә универстетиниң математика оқутқучиси вә алҗирийәниң мустәқиллиқи үчүн күрәш қилған маврис авдинниң йоқап кетишиниң, 61 йилдин буйанқи алҗирийә уруш тарихиниң қараңғулуқта қалған бир сәһиписи икәнлики билдүрүлди.

байанатта, пирезидент макронниң мәзкур вәқәни ениқлаш вақтиниң йетип кәлгәнликигә қарар қилғанлиқи әскәртилип: «пирезидент макрон маврис авдинниң өзиниң өйидә тутқан әскәрләр тәрипидин қийин-қистаққа елинип өлтүрүлгәнликини йаки өлгичә қийин-қистақ қилинғанлиқини, фирансийә дөлити намидин қобул қилиду» дейилди.

байанатта йәнә мундақ дейилди:

«пирезидент макрон алҗирийә уруши җәрйанида йоқап кәткәнләр һәққидики барлиқ дөләт архиплириниң әркин һалда тәкшүрүлүшини вә мәхпийәтликини әмәлдин қалдуридиған қанун маддисиниң түзүлүшини үмид қилиду. йоқап кәткәнләргә мунасивәтлик һәқиқәтләрниң ашкарилинишиға һәссә қошидиған һәммә кишини һәмкарлишишқа тәклип қилиду.»

1956-йили фирансийә парламенти чиқарған бир қанун билән, әйни вақитта фирансийәниң мустәмликә земини болған алҗирийәдә хәвпсизлик күчлиригә җәмийәт аманлиқини сақлаш мәқситидә кәң һоқуқ берилгән иди. мустәқиллиқни қоллайдиған миңларчә кишиниң җениға замин болған бу қанун маддиси билән, нурғун киши йоқап кәткәнләр тизимликигә киргүзүлгән иди. фирансийә армийәси әйни вақитта, маврис авдинниң түрмидин қачқанлиқи тоғрисида учур тарқатқан. 1962-йили чиқирилған омумий кәчүрүм қануни нәтиҗисидә маврис авдин делосиниң үсти йепилған иди.

айали вә үч пәрзәнти болған маврис авдинниң йоқап кетиш вәқәси, фирансийә армийәси алҗирийәдә өткүзгән җинайәтниң символлуқ дәваси дәп қарилатти.

сабиқ пирезидент франсуа оланд 2014-йили елан қилған байанатида, маврис авдинниң илгири сүрүлүп келиватқандәк армийәниң қолидин қачмиғанлиқини, тутуп турулуватқан мәркәздә өлтүрүлгәнликини қобул қилған иди.

пирезидент макрон 2017-йили феврал ейида сөзлигән бир нутқида: «мустәмликичилик инсанийәткә қарши өткүзүлгән җинайәттур» дегән иди.



مۇناسىۋەتلىك خەۋەرلەر