aqsaray: tramp bilen kimning ikkinchi qétimliq uchrishishigha dair teyyarliqlar dawamlishiwatidu

aqsaray, amérika qoshma ishtatliri pirézidénti donald tramp bilen shimaliy koréye lidiri kim jongunning ikkinchi bir bashliqlar yighini chaqirishigha alaqidar bir pilanni muzakire qiliwatqanliqlirini bildürdi.

aqsaray: tramp bilen kimning ikkinchi qétimliq uchrishishigha dair teyyarliqlar dawamlishiwatidu

türkiye awazi radiyosi xewiri: aqsaray bayanatchisi sarah sandérs, trampning ötken hepte muxbirlargha dégen <shimaliy koréye lidiridin kütüwatqan mektup> ni tapshurup alghanliqini, mektupning «nahayiti qizghin we ijabiy» ikenlikini eskertti.

kim jongun jamaetchilikke élan qilinishigha qoshulghan teqdirde, aqsarayning mektupning tepsilatini ortaqlishidighanliqini tekitligen sandérs, «mektupning asasliq nishani, nöwette biz orunlashturush basquchida turuwatqan pirézidént bilen ikkinchi qétim uchrishish telipide bolushtin ibaret» dégenlerni qeyt qildi.

bayanatchi sandérs, shimaliy koréyede ötken hepte axirida ötküzülgen jumhuriyet bayrimi toghrisidimu toxtilip, asasliqi puqralar we iqtisadiy tereqqiyatning ehmiyiti tekitlengen tebrikleshlerningmu «yaxshi niyetning körsetküchi» ikenlikini qeyt qildi.

aqsaray bayanatchisi, trampning shimaliy koréye siyasitide «pewquladde ünüm» hasil qilghanliqini, mektupning munasiwetlerning güllengenlikini körsitip béridighan bir pakit, ikenlikini éytti.

shimaliy koréyede ötken yillarda jumhuriyet bayrimida éghir tipliq qorallar we herbiy küch namayan qilinatti. bu yilqi murasimgha bir qanche tankidin bashqa peqet ölchemlik mangghan eskerlerning qatnishishi, uzun musapilik bashqurulidighan bomba batariyelirining orun almasliqi diqqetni tartti.

tramp bilen kim, 12 – iyunda singaporda körüshüp, shimaliy koréyening yadro qoralliridin xaliylashturulushi toghisida birdeklik hasil qilghanidi, biraq uchrishishtin kéyinki heptilerde ikki dölet arisidiki diplomatik atmosféra buzulushqa bashlighan, amérika terep shimaliy koréyeni yadro pilanidin waz kechmeslik bilen eyibligenidi.

jenubiy koréye bilen shimaliy koréye arisida 1953 – yili imzalanghan oq chiqirishni toxtitish kélishimi sayisida urush axirlashqan bolsimu, bir tinchliq kélishimi imzalanmighanliqi üchün, urush emeliy nuqtidin hélihem dawamlishiwatidu, dep qobul qilinidu.



مۇناسىۋەتلىك خەۋەرلەر