amérika alem armiyesi quridu

amérika muawin pirézidénti mayk péns: «alemde mewjud bolushimiz yéterlik emes, alemde hakimiyet tiklishimiz kérek» dédi.

amérika alem armiyesi quridu

türkiye awazi radiyosi xewiri: amérika muawin pirézidénti mayk péns amérika dölet mudapie ministirliqi (péntagon, besh burjeklik bina) da alem armiyesi toghrisida axbarat élan qilish yighini ötküzüp, 2020-yilliq nishanlar toghrisida melumat berdi.

u burunqi hökümetler teripidin sel qaralghan alemning talash-tartish qozghighan we qistangchiliq bir halgha kelgenlikini, shunga amérikaning alemdiki üstünlükini qoghdishi kéreklikini bildürdi.

u amérikaning herbiy küchini otturigha chiqqan tehditlerge qarshi téz sürette maslashqanliqini alahide eskertip: «armiyemizning tarixida kéyinki dewrning chong qismini yézishning waqti yétip keldi. kéyinki urush meydanigha teyyarlinish, dölitimiz we xelqimizge qaritilghan yéngi ewlad tehditlerni yingish hemde yoqitish üchün amérikani eng yaxshi jesur wezipilerge chaqirishning waqti keldi. amérikaning alem armiyesini qurushning waqti keldi» dédi.

u pirézidént donald trampning iyun éyida dölet mudapie ministirliqigha alem armiyesi qomandanliq ishtabini qurushqa teyyarliq qilish yolyoruqini chüshürgenlikini xatirilitip: «pirézidéntning éytqinigha oxshash, amérikaning alemde mewjud bolup turushila yéterlik emes, belki alemde hakimiyet tiklishimiz kérek, buni qilimiz» dédi.

u alem armiyesi qurush mesiliside kongrening qollishigha érishkenliklirini bildürüp, bu armiyening, hawa, quruqluq, déngiz, déngiz piyade qisimliri we sahil bixeterliki qomandanliq ishtabidin kéyin, altinchi qomandanliq merkiziy bolidighanliqini qeyt qildi.

u dölet mudapie ministirliqining alem armiyesining qurulushigha munasiwetlik tewsiye doklatini teyyarlighanliqliridin bésharet bérip: «hökümitimiz alem armiyesini 2020-yilighiche qurup chiqish nishani bilen, bu tewsiyelerni ijra qilish üchün yéqin waqit ichide qedem tashlaydu» dédi.

muawin pirézidént péns kongrening kelgüsi besh yil ichide alem tetqiqatliri üchün 8 milyard dollar qoshumche fond ajritilidighanliqini bildürdi.

u xitay bilen rusiyening yéqinqi waqitlarda nurghun yuqiri téxnikiliq qorallar we apparatlarni tereqqiy qildurup, amérikaning alemdiki üstünlükige tehdit salghanliqini éytti.

u xitayning 2007-yili özining süniy hemrahini étip chüshürgenlikini xatiriletti we buning xitayning alem qoralliridiki tereqqiy qilghan iqtidarini körsitidighanliqini qeyt qildi.

u rusiyening alem qatnishi ponkitliri we süniy hemrahlargha ziyan salalaydighan lazér nur sistémilirini tetqiq qiliwatqanliqini, ayropilandin alemdiki süniy hemrahlarni étip chüshüreleydighan bashqurulidighan bombilarni layihelewatqanliqining ilgiri sürülüwatqanliqini bildürdi.

u: «heriketliridin körünüp turuwatqinidek, düshmenlirimiz alemni urush meydanigha aylandurdi, amérika bu heywilerdin keynige chékinmeydu» dédi.

amérika pirézidénti donald tramp iyun éyida échilghan dölet xewpsizlik yighinida, dölet mudapie ministirliqigha, amérika armiyeside altinchi qomandanliq merkiziy süpitide «alem armiyesi qomandanliq ishtabi» qurush musapisini bashlash toghrisida yolyoruq chüshürgen idi.



مۇناسىۋەتلىك خەۋەرلەر