русийә-исраилийә мунасивәтлири күчәймәктә

русийә пирезиденти виладимир путин русийә-исраилийә мунасивәтлириниң күчийиватқанлиқини билдүрди.

русийә-исраилийә мунасивәтлири күчәймәктә

түркийә авази радийоси хәвири: русийә пирезиденти виладимир путин исраилийә баш министири бунйамин нетанйаһу билән көрүшти.

русийә дөләт пирезидентлиқ сарийи киримел тәрипидин елан қилинған байанатта, виладимир путин нетанйаһ билән пайтәхт москвада көрүшүштин илгири қилған сөзидә, русийә-исраилийә мунасивәтлириниң күчийиватқанлиқини ейтқанлиқи билдүрүлди.

икки дөләт мунасивәтлириниң иқтисадтин башқа саһәләрдиму күчийиватқанлиқини әскәрткән путин: омумән қилип ейтқанда, икки дөләт мунасивәтлири болупму сийасий вә һәрбий җәһәттики мунасивәтлиримиз оңушлуқ кетиватиду, деди.

нетанйаһу һәр қетимлиқ русийә зийарити вә  путин билән өткүзгән сөһбитиниң район вә дунйада ишәнч вә хәвпсизликни ашуруш үчүн, һәмкарлиқ орнитиш пурсити йаритип бәргәнликини ейтти.

һәр қетимлиқ көрүшүштә сүрийәниң нөвәттики вәзийити вә иранниң сүрийәдики нопузи қатарлиқ мәсилиләрниң күнтәртипкә кәлгәнликини ейтқан нетанйаһу, бир нәччә саәт илгири сүрийәдин исраилийәгә киргән бир учқучисиз айропиланниң етип чүшүрүлгәнликини әскәртти.

нетанйаһу: һәм һава һәмдә қуруқлуқ чегралиримизға тәһдит елип келидиған һәр қандақ һәрикәт йаки қилмишни дәрһал бир тәрәп қилидиғанлиқимизни алаһидә тәкитләп өтмәкчимән, деди.

путин билән өткүзүлгән көрүшүшләрдә бу мәсилиләрниң музакирә қилинғанлиқи үчүн путинға миннәтдарлиқини билдүргән нетанйаһу мундақ деди: « икки дөләт арисидики һәмкарлиқ районниң муқимлиқи үчүн муһим амилдур.»



مۇناسىۋەتلىك خەۋەرلەر