йәмән армийәси илгирилимәктә

йәмән армийәси дөләтниң шималидики сада вә оттура қисимдики бәйда вилайитидә 10 әскиридин айрилип, сәккиз әскири әсиргә чүшкән һусийларниң қолидин бәзи җайларни қайтурувалди.

йәмән армийәси илгирилимәктә

түркийә авази радийоси хәвири: йәмән алаһидә биригадисиниң қомандани адил бин әлмусаби армийә учур-алақә мәркизигә байанат бәргәндә, үч күндин буйан сада вилайитиниң ғәрбий җәнубидики әззаһир наһийәсиниң мәркизи әлмәлаһиз районида хәвпсизлик қисимлири билән һусийлар оттурисида шиддәтлик тоқунушларниң йүз бәргәнликини билдүрди.

у хәвпсизлик қисимлириниң бәзи җайларда контроллуқни қолға киргүзүп илгирилигәнликини, һусийларниң зор чиқимға учриғанлиқини қәйт қилди.

йәмән 26-пийадиләр биригадисиға қарашлиқ алаһидә қисимниң қомандани исам буһайбиһ бәйда вилайитидики ақәбәтул қанзаа теғиниң контроллуқини қолға киргүзгәнликлирини билдүрди.

билдүрүлишичә, тоқунушларда һусийларниң 10 әскири өлгән, сәккиз әскири әсиргә чүшкән. көмүп қойулған минаниң партлиши нәтиҗисидә йәмән армийәсиниң үч әскири җенидин айрилған, бир қанчә әскәр йариланған.

узун вақиттин буйан сийасий муқимсизлиқ һөкүм сүрүватқан йәмәндә, һусийлар билән қанунлуқ һөкүмәт қисимлири оттурисида шиддәтлик тоқунушлар йүз бәрмәктә. һусийлар 2014-йили сентәбирдин тартип пайтәхт санаа вә бәзи районларниң контроллуқини қолға киргүзгән болса, сәуди әрәбистан башчилиқидики бирләшмә қисим һусийларға қарши йәмән һөкүмитини қоллап кәлмәктә.



مۇناسىۋەتلىك خەۋەرلەر