amérika b d t kishilik hoquq kéngishidin ayrildi

amérikaning b d t da turushluq daimiy wekili nikki haléy amérikaning kishilik hoquq kéngishidin ayrilghanliqini jakarlidi. u: "bu kéngesh isimigha layiq emes" dédi.

amérika b d t kishilik hoquq kéngishidin ayrildi

türkiye awazi radiyosi xewiri: nikki haléy tashqi ishlar ministiri mayk pompéyo bilen tashqi ishlar ministirliqida ötküzülgen axbarat élan qilish yighinida, amérikaning kishilik hoquq kéngishidin ayrilghanliqini élan qildi.

u pirézidént donald trampning bir yil burun b d t kishilik hoquq kéngishide islahat bolmighanda amérikaning chékinidighanliqini eskertkenlikini xatiriletken halda, bu jeryanda kéngeshte héchqandaq islahat bolmighanliqini bildürdi.

u kéngeshtiki xitay, kuba we wénézuéla qatarliq döletlerning kishilik hoquqni depsende qiliwatqanliqini tekitlep, kéngeshning isirailiyege qarshi bir tereplime qarashta ikenlikini ilgiri sürdi. u: "kéngeshning isirailiyege nisbeten qatmalliship qalghan bir tereplime qarishi bar" dédi.

u kéngeshte yéngiliqlar emelge ashqandin kéyin, qaytidin eza bolushi mumkinlikini qeyt qildi.

amérika tashqi ishlar ministiri mayk pompéyo bolsa, kéngeshning kishilik hoquqni qoghdashta yétersiz qalghanliqini bildürdi.

u kéngeshning "kishilik hoquqni depsende qilghan döletlerge yanbasqanliqi" ni ilgiri sürüp, isirailiyege qaritilghan tenqidlerning "ikki yüzlimichilik" ikenlikini bildürdi.

b d t bash katipi bayanatchisi stéfané dujarik amérikaning b d t kishilik hoquq kéngishidin ayrilghanliqini jakarlishidin kéyin yazma bayanat élan qildi. u bayanatida: "bash katip gutérs amérikaning kishilik hoquq kéngishide turushini xalaydu. b d t kishilik hoquq kéngishi dunya miqyasida kishilik hoquqni teshwiq qilishta we qoghdashta muhim rol oynimaqta" dédi.

b d t kishilik hoquq kéngishi 2-iyulda toplinip, pelestin-isirailiye mesilisini muzakire qilidu. türkiye kishilik hoquq kéngishining közetküchi ezasi bolup, jenweni merkez qilghan kéngeshning 47 ezasi bar.



مۇناسىۋەتلىك خەۋەرلەر