америка б д т кишилик һоқуқ кеңишидин айрилди

американиң б д т да турушлуқ даимий вәкили никки һалей американиң кишилик һоқуқ кеңишидин айрилғанлиқини җакарлиди. у: "бу кеңәш исимиға лайиқ әмәс" деди.

америка б д т кишилик һоқуқ кеңишидин айрилди

түркийә авази радийоси хәвири: никки һалей ташқи ишлар министири майк помпейо билән ташқи ишлар министирлиқида өткүзүлгән ахбарат елан қилиш йиғинида, американиң кишилик һоқуқ кеңишидин айрилғанлиқини елан қилди.

у пирезидент доналд трампниң бир йил бурун б д т кишилик һоқуқ кеңишидә ислаһат болмиғанда американиң чекинидиғанлиқини әскәрткәнликини хатириләткән һалда, бу җәрйанда кеңәштә һечқандақ ислаһат болмиғанлиқини билдүрди.

у кеңәштики хитай, куба вә венезуела қатарлиқ дөләтләрниң кишилик һоқуқни дәпсәндә қиливатқанлиқини тәкитләп, кеңәшниң исираилийәгә қарши бир тәрәплимә қарашта икәнликини илгири сүрди. у: "кеңәшниң исираилийәгә нисбәтән қатмаллишип қалған бир тәрәплимә қариши бар" деди.

у кеңәштә йеңилиқлар әмәлгә ашқандин кейин, қайтидин әза болуши мумкинликини қәйт қилди.

америка ташқи ишлар министири майк помпейо болса, кеңәшниң кишилик һоқуқни қоғдашта йетәрсиз қалғанлиқини билдүрди.

у кеңәшниң "кишилик һоқуқни дәпсәндә қилған дөләтләргә йанбасқанлиқи" ни илгири сүрүп, исираилийәгә қаритилған тәнқидләрниң "икки йүзлимичилик" икәнликини билдүрди.

б д т баш катипи байанатчиси стефане дуҗарик американиң б д т кишилик һоқуқ кеңишидин айрилғанлиқини җакарлишидин кейин йазма байанат елан қилди. у байанатида: "баш катип гутерс американиң кишилик һоқуқ кеңишидә турушини халайду. б д т кишилик һоқуқ кеңиши дунйа миқйасида кишилик һоқуқни тәшвиқ қилишта вә қоғдашта муһим рол ойнимақта" деди.

б д т кишилик һоқуқ кеңиши 2-ийулда топлинип, пәләстин-исираилийә мәсилисини музакирә қилиду. түркийә кишилик һоқуқ кеңишиниң көзәткүчи әзаси болуп, җәнвәни мәркәз қилған кеңәшниң 47 әзаси бар.



مۇناسىۋەتلىك خەۋەرلەر