ruhani elsani bilen yemen weziyiti toghrisida sözleshti
iran pirézidénti hesen ruhani, «yemen kirizisining siyasiy yollar bilen hel qilinishi kéreklikini éytti.
türkiye awazi radiyosi xewiri: iran pirézidénti hesen ruhani qatar emri sheyx temim bin hemed al sani bilen téléfonda körüshüp, rayongha alaqidar mesililer toghrisida pikir almashturdi؛ ruhani téléfon söhbiti jeryanida, yemenning qizil déngiz boyigha jaylashqan port shehiri hudeydediki toqunushlar toghrisida toxtaldi we yemen kirizisining urush yoli bilen emes, siyasiy yollar arqiliq hel qilinishi kéreklikini qeyt qildi.
qatar emri sheyx temim bin hemed al sanimu rayondiki saqliniwatqan mesililerning diyalog yoli bilen hel qilinishi kéreklikini eskertip, héchbir döletning bashqa bir döletke özining qarashlirini tangmasliqi lazimliqini tekitlidi.
seudi erebistan himayisidiki yemen küchliri, charshenbe ittipaqdash küchlerning qollishi bilen hudeyde shehiri we hudeyde portini 2014 – yili séntebirdin buyan rayongha hökümranliq qiliwatqan husiylardin qayturup élish üchün heriketke ötkenidi.
uzundin buyan siyasiy muqimsizliq höküm sürüwatqan yemende husiylar, 2014 – yili séntebirdin buyan paytext sana we bezi rayonlarning kontrolluqini qolida tutup turmaqta. seudi erebistan bashchiliqidiki ittipaqdash küchler bolsa, 2015 – yili marttin buyan husiylargha qarshi yemen hökümitini qollap kelmekte.
yemendiki urushta 10 mingdin artuq puqraning hayatidin ayrilghanliqi, 2 ming ademning xoléraning qurbani bolghanliqi, yérim milyon yuqumluq késel bimarining barliqi, 3 ming ademning öy – makanidin ayrilip qalghanliqi bildürülmekte.
