хәвпсизлик кеңишидә рәт қилинған пәләстин қарар лайиһәси омумий кеңәштә қобул қилинди

бирләшкән дөләтләр тәшкилати (б д т) омумий кеңиши, пәләстин хәлқини қоғдаш тәләп қилинған қарар лайиһәсини қобул қилди.

хәвпсизлик кеңишидә рәт қилинған пәләстин қарар лайиһәси омумий кеңәштә қобул қилинди

түркийә авази радийоси хәвири: б д т  омумий кеңиши, түркийәниң алаһидә тиришчанлиқ көрситишидин кейин алҗирийәниң қоллап – қуввәтлиши билән йиғин чақирип, пәләстин қарар лайиһәсини музакирә қилди.

б д т  омумий кеңиши, б д т  хәвпсизлик кеңишидә америкиниң рәт қилишиға учриған «пәләстинликләрни қоғдаш» тоғрисидики қарар лайиһәсини қайтидин музакирә қилип авазға қойуш арқилиқ қобул қилди؛ лайиһәгә 120 дөләт қоллап, америка қошма иштатлири, исраилийә, австралийә, маршал араллири, науру, того, соломон араллири, микро незийә федератсийәси қатарлиқ  8 дөләт рәт қилип беләт ташлиди, 45 дөләт беләт ташлаштин йалтайди.

йиғинда, америкиниң қарар лайиһәсигә һамасни әйибләйдиған ибариләрни киргүзүш тоғрисидики тәклипи рәт қилинди.

пәләстин дөләт рәиси мәһмуд аббас қарар лайиһәсиниң қобул қилинишиға «адаләт вә хәлқара қанунниң ғәлибиси» дәп баһа бәрди.

б д т  баш катипидин 60 күн ичидә пәләстинлик пуқраларниң бихәтәрликини қоғдаш йолида ташлиниши керәк болған қәдәмләргә алақидар бир парчә доклат тәййарлап чиқиши тәләп қилинған қарарда, исраилийәниң мувазинәтсиз күч ишлитишни тохтитиши вә ғәззә муһасирисини бикар қилишиму тәләп қилинди.

пәләстиндики 30 – марттин буйан күчийип кәткән зораванлиқ вәқәлиригиму орун берилгән қарар лайиһәсидә, балилар, сәһийә хадимлири вә жуналистларниңму исраилийәниң зораванлиқиға дуч кәлгәнлики алаһидә тәкитләнди.

б д т  омумий кеңиши қарарлириниң иҗраийә күчи болмисиму, дөләтләрниң позитсийәсини ипадиләш җәһәттин муһим һесаблиниду.

омумий кеңәш йиғинидин илгири кишилик һоқуқни көзитиш тәшкилатиму исраилийәни күчлүк рәвиштә агаһландуруп, ғәззәдә намайишчиларниң өлүп кетишини кәлтүрүп чиқарған дәриҗидин ташқири күч ишлитишниң уруш җинайити категорийәсигә кириш мумкинчилики барлиқини әскәртти.



مۇناسىۋەتلىك خەۋەرلەر