парс қолтуқи дөләтлири һизбуллаһни террорлуқ тизимликигә киргүзди

сәуди әрәбистан, ливандики һизбуллаһ тәшкилати баш катиби һәсән насраллаһ билән муавини қасимниму өз ичигә алған 8 киши вә 2 органни террорлуқ тизимликигә киргүзди.

парс қолтуқи дөләтлири һизбуллаһни террорлуқ тизимликигә киргүзди

 

түркийә авази радийоси хәвири: сәуди әрәбистан рәсмий хәвәр агентлиқи «SPA»ниң дөләт бихәтәрлик министирлиқи тәрипидин елан қилинған байанатни мәнбә көрсәткән хәвиридә, һизбуллаһниң қарар мәркизи шура кеңиши әзалиридин насраллаһ вә қасимдин башқа йәнә, муһәммәд йәзбәк, һусәйин хәлил, ибраһим әмин әссәйид қатарлиқ кишиләрниңму террорлуқ тизимликигә киргүзүлгәнлики билдүрүлди.

бу қарарниң террорлуқниң малийә мәнбәсигә зәрбә бериш мәркизий «TFTC» ниң тәң дәириҗилик башлиқи америка һәмдә әза дөләтләрдин бәһрәйн, күвәйт, умман, қатар вә әрәб бирләшмә хәлипилики тәрипидинму ортақ мақулланғанлиқи қәйт қилинди.

байанатта, һизбуллаһни қоллаш характерлик паалийәтләрдә болған талал һаммийә, әли йүсүф шәррара вә һүсәйин ибраһими қатарлиқ 3 киши билән «Spectrum Group» вә «маһир қурулуш вә һөддигәрлик ширкити» ниңму террорлуқ тизимликигә киргүзүлгәнлики уқтурулди. бу кишиләр вә органларниң б д т ниң 1373 - номурлуқ һөҗҗитигә мас һалда сәуди әрәбистандики террорлуққа вә террорлуқни малийә билән тәминләш җинайәтлиригә қарши күрәш системисиниң хизмәтлири даирисидә террорлуқ тизимликигә киргүзүлгәнлики билдүрүлди. тизимликкә елинған бу кишиләрниң алақидар дөләтләрдики барлиқ мал - мүлки тоңлитилди.

байанатта, «һизбуллаһ йәр шари характерлик террорлуқ тәшкилати» дәп әйиблиниш билән биргә йәнә, һизбуллаһниң қораллиқ йаки сийасий паалийәт билән шуғуллиниватқан әзалириниңму бу җәһәттә пәрқләнмәйдиғанлиқи алаһидә тәкитләнди.  

һизбуллаһ вә униң қоллиғучиси иран йуқириқи байанатта, «сүрийәдики инсанийәткә зит мәсилиләрни техиму узунға созуш, ирақ вә йәмәндики зораванлиқ вәқәлирини техиму әвҗ алдуруш, ливанни вә ливан хәлқини хәвпкә иттириштин башқа йәнә, пүтүн оттура шәрқни муқимсизлаштуруш билән» әйибләнди.

америка малийә министирлиқиму қисқиғинә мәзгил илгири һизбуллаһ баш катипи насраллаһқа қаритилған ембарголарниң техиму кеңәйтилгәнликини, наим қасимниму өз ичигә 4 әмәлдарниң тунҗи қетим ембарго тизимликигә киргүзгәнликини елан қилған иди. 



مۇناسىۋەتلىك خەۋەرلەر