filippin bilen kuweyt arisidiki «ishchi kirizisi» hel bolushqa yüzlendi

filippin pirézidénti rodrigo dutérté, filippinliq ishchilarning kuweytke bérishigha qoyulghan cheklimining bikar qilinishi toghrisida yolyoruq chüshürdi.

filippin bilen kuweyt arisidiki «ishchi kirizisi» hel bolushqa yüzlendi

türkiye awazi radiyosi xewiri: filippin pirézidéntliq mehkimisi bayanatchisi harriy roqué, rodrigo dutérténing emgek ishliri ministiri silwésta béllogha, filippinliq ishchilarning ishlesh üchün kuweytke bérishigha qoyulghan cheklimining pütünley bikar qilinishi toghrisida yolyoruq chüshürgenlikini uqturdi.

cheklimining qachandin bashlap emeldin qaldurulidighanliqi toghrisida téxiche héchqandaq bayanat bérilmidi.

dutérté, 29 – aprélda filippinliq ishchilarning kuweytke bérishini meni qilghan, féwral éyidin buyan ijra qiliniwatqan belgilimining uzun mezgillik tüzümge aylandurulidighanliqini bildürgen we filippinliqlarning ishlech üchün kuweytke bérishigha buningdin kéyin qetiy yol qoyulmaydighanliqini qeyt qilghanidi.

kuweyttiki filippinliq ishchilarning xalisa u dölette turushni dawamlashturalaydighanliqini tekitligen dutérté, hökümetning qaytmaqchi bolghanlargha yardemchi bolidighanliqini bildürgenidi.

bezi kuweytliklerning öyliride ishleydighan filippinliq xizmetchilerning yoqilip kétishi bilen bashlanghan mesile, ijtimaiy taratquda xizmetchi ayallarning filippin elchixanisining diplomatik aptomobilliri bilen öylerdin élip qéchilghanliqigha dair körünüshlerning tarqilishidin kéyin diplomatik kirizisqa aylanghanidi.

buning bilen birge, kuweyt xewpsizlik küchliri uzundin buyan izdériki qilinalmighan bir filippinliq xizmetchining jesitini buningdin bir ayche ilgiri bir liwan puqrasi bilen süriyelik ayalning öyidiki tonglatqudin tapqanidi.

weqedin kéyin filippin bilen kuweyt arisida soghuqchiliq körülgenidi.

filippin pirézidénti rodrigo dutérté féwral éyining bashlirida muxbirlarni kütüwélish yighini ötküzüp, kuweyttiki tüzümning filippin puqralirini qoghdiyalmighanliqini eskertken halda, bu döletke filippinliq ayal ishchilarning bérishini chekligenliklirini, munasiwetlik qararning pars qoltuqidiki bashqa döletlergimu kéngeytilish mumkinchiliki barliqini bildürgenidi.

kuweyt tashqi ishlar ministirliqi, 25 – aprélda filippinning kuweytte turushluq bash elchisi rénato pédro owilani «xalanmighan adem» dep élan qilip, kéchikkendimu bir hepte ichide kuweyttin chiqip kétishini telep qilghanidi.

kuweyt muawin tashqi ishlar ministiri xalid eljarullah 27 – apréldiki muxbirlarni kütüwélish yighinida, filippin tashqi ishlar ministirliqining ötken hepte kuweytning manilada turushluq bash elchisige bashta ayal xizmetchiler mesilisi bolup filippin puqralirining mesililirige alaqidar ultimatumdiki teleplerning bir qismini orundashqa bashlighanliqlirini bildürgenidi.

jarullah, bashqa telepler bilen filippinliq ayal xizmetchilerning qachurulush weqesige arilashqanliqi tüpeyli tutulghan 800 ademning döletlirige yol séliwétilishi toghrisidimu hemkarliq ornitishqa teyyar ikenliklirini qeyt qilghanidi.


خەتكۈچ: ishchi , kuweyt , filippin

مۇناسىۋەتلىك خەۋەرلەر