филиппин билән кувәйт арисидики «ишчи киризиси» һәл болушқа йүзләнди

филиппин пирезиденти родриго дутерте, филиппинлиқ ишчиларниң кувәйткә беришиға қойулған чәклиминиң бикар қилиниши тоғрисида йолйоруқ чүшүрди.

филиппин билән кувәйт арисидики «ишчи киризиси» һәл болушқа йүзләнди

түркийә авази радийоси хәвири: филиппин пирезидентлиқ мәһкимиси байанатчиси һаррий роқуе, родриго дутертениң әмгәк ишлири министири силвеста беллоға, филиппинлиқ ишчиларниң ишләш үчүн кувәйткә беришиға қойулған чәклиминиң пүтүнләй бикар қилиниши тоғрисида йолйоруқ чүшүргәнликини уқтурди.

чәклиминиң қачандин башлап әмәлдин қалдурулидиғанлиқи тоғрисида техичә һечқандақ байанат берилмиди.

дутерте, 29 – апрелда филиппинлиқ ишчиларниң кувәйткә беришини мәни қилған, феврал ейидин буйан иҗра қилиниватқан бәлгилиминиң узун мәзгиллик түзүмгә айландурулидиғанлиқини билдүргән вә филиппинлиқларниң ишләч үчүн кувәйткә беришиға буниңдин кейин қәтий йол қойулмайдиғанлиқини қәйт қилғаниди.

кувәйттики филиппинлиқ ишчиларниң халиса у дөләттә турушни давамлаштуралайдиғанлиқини тәкитлигән дутерте, һөкүмәтниң қайтмақчи болғанларға йардәмчи болидиғанлиқини билдүргәниди.

бәзи кувәйтликләрниң өйлиридә ишләйдиған филиппинлиқ хизмәтчиләрниң йоқилип кетиши билән башланған мәсилә, иҗтимаий таратқуда хизмәтчи айалларниң филиппин әлчиханисиниң дипломатик аптомобиллири билән өйләрдин елип қечилғанлиқиға даир көрүнүшләрниң тарқилишидин кейин дипломатик киризисқа айланғаниди.

буниң билән биргә, кувәйт хәвпсизлик күчлири узундин буйан издерики қилиналмиған бир филиппинлиқ хизмәтчиниң җәситини буниңдин бир айчә илгири бир ливан пуқраси билән сүрийәлик айалниң өйидики тоңлатқудин тапқаниди.

вәқәдин кейин филиппин билән кувәйт арисида соғуқчилиқ көрүлгәниди.

филиппин пирезиденти родриго дутерте феврал ейиниң башлирида мухбирларни күтүвелиш йиғини өткүзүп, кувәйттики түзүмниң филиппин пуқралирини қоғдийалмиғанлиқини әскәрткән һалда, бу дөләткә филиппинлиқ айал ишчиларниң беришини чәклигәнликлирини, мунасивәтлик қарарниң парс қолтуқидики башқа дөләтләргиму кеңәйтилиш мумкинчилики барлиқини билдүргәниди.

кувәйт ташқи ишлар министирлиқи, 25 – апрелда филиппинниң кувәйттә турушлуқ баш әлчиси ренато педро овилани «халанмиған адәм» дәп елан қилип, кечиккәндиму бир һәптә ичидә кувәйттин чиқип кетишини тәләп қилғаниди.

кувәйт муавин ташқи ишлар министири халид әлҗаруллаһ 27 – апрелдики мухбирларни күтүвелиш йиғинида, филиппин ташқи ишлар министирлиқиниң өткән һәптә кувәйтниң манилада турушлуқ баш әлчисигә башта айал хизмәтчиләр мәсилиси болуп филиппин пуқралириниң мәсилилиригә алақидар ултиматумдики тәләпләрниң бир қисмини орундашқа башлиғанлиқлирини билдүргәниди.

җаруллаһ, башқа тәләпләр билән филиппинлиқ айал хизмәтчиләрниң қачурулуш вәқәсигә арилашқанлиқи түпәйли тутулған 800 адәмниң дөләтлиригә йол селиветилиши тоғрисидиму һәмкарлиқ орнитишқа тәййар икәнликлирини қәйт қилғаниди.



مۇناسىۋەتلىك خەۋەرلەر