erebistan shahzadisi misir taratqulirining küntertipke alaqidar soallirigha jawab berdi

seudi erebistan text warisi shahzadisi muhemmed bin selman, «husiylardin qanuniy salahiyetni qayturup élish nishanigha yétishke az qalghanliqi» ni éytti.

erebistan shahzadisi misir taratqulirining küntertipke alaqidar soallirigha jawab berdi

türkiye awazi radiyosi xewiri: shahzade muhemmed bin selmanning qahirediki ziyariti jeryanida misirliq muxbirlar bilen ötküzgen söhbiti döletning yérim resmiy géziti «elehram» da élan qilindi؛ u mezkur söhbet jeryanida, yemen, pelestin, qatar we iran qatarliq rayon we xelqaradiki özgirishler toghrisida pikir bayan qildi.

muhemmed bin selman, yemende husiylarni bir terep qilip qanuniy salahiyetni qayturup élish nishanigha yétishke az qalghanliqini, nishan ishqa ashqandin kéyin urushning axirlishidighanliqini éytti.

pelestin mesilisi toghrisidimu toxtalghan shahzade muhemmed bin selman, pelestinliklerning paytexti sherqiy quddus bolghan musteqil pelestin döliti qurush hoquqini qollaydighanliqini eskertip, 1967 – yilidin ilgiriki chégralar ichide musteqil bir pelestin döliti qurush qararining «seudi erebistan we misirning özgermes pirinsiplirining biri» ikenlikini tekitlidi.

shahzade muhemmed bin selman pars qoltuqi kirizisi toghrisida toxtilip, «qatar muhasirining amérika qoshma ishtatlirining kubagha qaratqan muhasirisigha oxshash on yillarche dawamlishish éhtimali barliqi» ni éytti.

u yene, iranning siyasetlirige «düshmenlerche» dep baha berdi.

muhemmed bin selman, seudi erebistandiki shielerge zulum qilinmighanliqini eskertip, dölitidiki shielerning özliri yashawatqan jaylarning güllinishige hesse qoshup kéliwatqanliqini we yuqiri derijilik menseplerni tutqanliqini éytti.


خەتكۈچ: selman , shahzade , misir , erebistan

مۇناسىۋەتلىك خەۋەرلەر