хәвпсизлик кеңиши трампниң қуддус қарари тоғрулуқ җиддий йиғин чақирди
бирләшкән дөләтләр тәшкилати хәвпсизлик кеңиши америка пирезиденти трампниң қуддусни исраилийәниң пайтәхти дәп етирап қилиш қарари тоғрулуқ җиддий йиғин чақирди.
түркийә авази радийоси хәвири: бирләшкән дөләтләр тәшкилатиниң оттура шәрқ тинчлиқ мусаписи алаһидә маслаштурғучиси николай младенов йиғинда қилған сөзидә, трампниң қуддус қараридин кейин районниң вәзийитиниң җиддийлишип кәткәнликини тәкитлиди һәмдә баш катип антонио гутерресниң «исраилийә пәләситн оттурисидики ихтилапни биваситә музакириләр арқилиқ һәл қилиш зөрүр» вә «киризисни икки дөләтлик түзүм чариси арқилиқ һәл қилиш тоғрулуқ б пилани йоқ» тәриқисидики сөзлирини хатириләтти.
америка қошма иштатлириниң бирләшкән дөләтләр тәшкилатида турушлуқ вәкили ники һейли болса, трампниң қуддус қарариниң тинчлиқ йолида көрситиливатқан тиришчанлиқларни йәниму йүксәк сәвийәгә йәткүзүшни нишан қилидиғанлиқини илгири сүрди.
йиғинда, әнглийә, фирансийә, германийә, италийә вә шиветсийә қатарлиқ дөләтләрниң баш әлчилири трампниң қарарини қобул қилмайдиғанлиқлирини җакарлиди.
мәзкур дөләтләрниң баш әлчилириниң йиғиндин кейин елан қилған ортақ байанатида мундақ дейилди: «америка қошма иштатлириниң қуддус қарарини қобул қилмаймиз. чүнки бу қарар хәвпсизлик кеңишиниң қарарлириға хилаптур. киризис икки дөләтлик түзүм чариси арқилиқ һәл қилинғанға қәдәр қуддусқа алақидар һечқандақ бир игилик һоқуқни қобул қилмаймиз. шуниң билән бир вақитта, вашингтондин пәләситн – исраилийә тинчлиқи үчүн тәпсилий пиланларни оттуриға қойушини күтимиз.»
