«тинчлиқпәрвәр»аң сан сучи зулумға сүкүт қилиш билән әйибләнди

хәлқара кәчүрүм тәшкилати билән инсан һәқлири көзитиш тәшкилати «тинчлиқпәрвәр»аң сан сучини зулумға сүкүт қилиш билән әйиблиди.

«тинчлиқпәрвәр»аң сан сучи зулумға сүкүт қилиш билән әйибләнди

түркийә авази радийоси хәвири: хәлқара кәчүрүм тәшкилати билән инсан һәқлири көзитиш тәшкилати бирма ташқи ишлар министири вә дөләт ишлири министири аң сан су чини араканлиқ мусулманлар дуч келиватқан зулумға сүкүт қилиш билән әйиблиди.

бирләшкән дөләтләр тәшкилати омумий кеңишидә мухбирларни күтүвелиш йиғини өткүзгән икки аммиви тәшкилатниң вәкиллири, араканлиқ мусулманларниң нөвәттики ечинишлиқ вәзийити үстидә алаһидә тохтилип хәлқара җәмийәтни дәрһал һәрикәткә өтүшкә чақирди.

хәлқара кәчүрүм тәшкилати киризис бир тәрәп қилиш ишханиси мудири тирана һәсән баңладиштин видио арқилиқ улинип бирма армийәси әскәрлириниң араканлиқларға оқ йағдурғанлиқлирини ейтти.

араканлиқ мусулманларниң йезилириниң көйдүрүп ташланғанлиқини ейтқан һәсән мундақ деди: «роһиңйалиқларниң мәвҗудлуқи билән һәқ-һоқуқлири пүтүнләй инкар қилинмақта.»

инсан һәқлири көзитиш тәшкилати б б д мәсули лойис чарбонне болса мундақ деди: «роһиңйалиқлар бирмадин тамамән қоғлап чиқирилмақта, бу ирқий қирғинчлиқниң гәвдилик ипадилиридин һесаблиниду, б д т хәвпсизлик кеңишниң бирмадики зоравнлиқ вәқәлири үстидә йепиқ һаләттә йиғин ечиши карға кәлмәйватиду, бу әһвал бирма мәсуллири билән әскәрлиригә пурсәт йаритип бериватиду.»

йилларчә нәзәр бәнд астида турған аң сан су чиниң қойуп берилиши үчүн зор күч чиқарған бу икки аммиви тәшкилатниң вәкиллири, нобел тинчлиқ мукапатиға еришкән аң сан су чини  араканлиқ мусулманлар дуч келиватқан зулумға сүкүт қилип турувелиш билән әйибләп, қаттиқ үмидсизләнгәнликлирини әскәртишти.

бирма армийәсиниң қораллиқ милитанларға зәрбә беришни баһанә қилип араканлиқларға қилған һуҗумлирида 25-авғусттин буйан һазирғичә миңларчә араканлиқ мусулман өлгән болса, бирма һөкүмитиниң араканға кирип-чиқишқа рухсәт қилмаслиқи сәвәбидин араканда өлгәнләрниң санини тоғра вә толуқ игиләп чиқишниң мумкин болмвайватқанлиқи билдүрүлмәктә.

һуҗумларда 150дин артуқ йеза бирма әскәрлири билән милләтчи буддистлар тәрипидин көйдүрүп ташланди, он миңларчә араканлиқ мусулман бихәтәрликни көздә тутуп райондин қачти, бирмадин қачқан араканлиқ мусулманлар тағлиқ районлар, наф дәрйаси йаки деңиз арқилиқ баңладишқа кәтмәктә, б д т ниң билдүрүшичә,  25-авғусттин буйан баңладиштин панаһлиқ тилигәнләрниң сани 370 миңға йәткән.



مۇناسىۋەتلىك خەۋەرلەر