ھەربىي ئىشلار كومىتېتىنىڭ سابىق مۇئاۋىن رەئىسى شۈ سەيخۇ ئۆلدى
چىرىكلىك بىلەن تەكشۈرۈلۈۋاتقان خىتاي ھەربىي ئىشلار كومىتېتىنىڭ سابىق مۇئاۋىن رەئىسى شۈ سەيخۇ داۋالىنىۋاتقان دوختۇرخانىدا ئۆلدى.
265610
- تۈركىيە ئاۋازى رادىيوسى خەۋىرى: خىتايدا چىرىكلىك سەۋەبىدىن تەكشۈرۈلۈۋاتقان يۇقىرى دەرىجىلىك ھەربىي ئەمەلدار ۋە خىتاي كوممۇنىستىك پارتىيەسىنىڭ سابىق ئەزاسى شۈ سەيخۇنىڭ راك كېسىلى سەۋەبىدىن ئۆلگەنلىكى بىلدۈرۈلدى.
شىنخۇا ئاگېنتلىقىنىڭ بۇ ھەقتىكى خەۋىرىگە ئاساسلانغاندا، 2014 – يىلى پارىخورلۇق ۋە ھوقۇقىدىن قالايمىقان پايدىلىنىش بىلەن ئەيىبلىنىپ تەكشۈرۈلۈۋاتقان خىتاي ھەربىي ئىشلار كومىتېتىنىڭ سابىق مۇئاۋىن رەئىسى شۈ سەيخۇ دوۋساق راكى كېسەللىكى سەۋەبىدىن داۋالىنىۋاتقان دوختۇرخانىدا ئۆلگەن.
2014 – يىلى 15 – مارت ھەققىدە تەكشۈرۈش باشلانغان شۈسەيخۇنىڭ ھوقۇقىدىن پايدىلىنىپ، بەزى كىشىلەرنىڭ خۇسۇسىي ئىشلىرىنى قىلىپ بېرىپ پارا ئالغانلىقى ئېلان قىلىنغان ئىدى. 2014 - يىلى 30 – ئىيۇن خىتاي دۆلەت رەئىسى شى جىنپىڭنىڭ باشچىلىقىدىكى مەركىزىي سىياسىي بىيۇروسى ئورتاق قارار بىلەن شۈ سەيخۇنى پارتىيەدىن قوغلاپ چىقارغان بولۇپ، 2014 – يىلى 27 – ئۆكتەبىردە ئۇنىڭ دېلوسى ھەربىي تەپتىشلەر تەرىپىدىن سوتقا ئەۋەتىپ بېرىلگەن ئىدى.
