chet el metbuatlirida bu hepte: 04.10.2017

bu heptilik chet el metbuatliridin tallap teyyarlighan muhim xewerlirimizning qisqiche mezmunliri töwendikiche:

chet el metbuatlirida bu hepte: 04.10.2017

türkiye awazi radiyosi: rusiyede chiqidighan «‹ Ria Novosti› géziti», «erdoghan türkiyening yawropa ittipaqigha eza bolmisimu qilche ziyan tartmaydighanliqini éytti» serlewhilik xewiride, töwendiki melumatlarni oqurmenliri bilen ortaqlashti:

jumhur reis erdoghan yawropa ittipaqining türkiyening ezaliqigha köngül bölüshining zörürlükini tekitlidi hemde türkiyening yawropa ittipaqigha eza bolmisimu qilche ziyan tartmaydighanliqini eskertti.

erdoghan türkiye büyük millet mejlisining 26 – qétimliq 3 – qanun chiqirish yili ish bashlash murasimida qilghan sözide, mundaq dédi: «yawropa ittipaqining muhim pilanlirini ishqa ashurushining birdinbir yoli türkiyening yawropa ittipaqigha ezaliqidur. derweqe, türkiye yawropaning qudret tépishigha hesse qoshushqa we yéngi pilan layihelirini qollashqa teyyardur. biraq yawropa ittipaqi bashqa bir yolni tallisa, bu türkiyege nisbeten héchqanche mesile emes. chünki türkiye yawropa ittipaqigha eza bolmisimu qilche ziyan tartmaydu, tereqqiy menzilgahigha yétish yolida dawamliq ilgirileydu.»

iranning «<irna> xewer agéntliqi», «ruhani iran bilen türkiyening ottura sherq rayonining muqimliq menbesi ikenlikini éytti» serlewhilik xewiride, töwendiki uchurlargha orun ajratti:

iran pirézidénti hesen ruhani türkiye armiyesi bash qomandanliq ishtabining bashliqi hulusi aqarni qobul qilghanda, türkiye bilen iranning ottura sherq rayonidiki dost we qérindash dölet ikenlikini, jümlidin ikki dölet munasiwetlirining barghanséri tereqqiy qiliwatqanliqini tekitlep mundaq dédi: «nöwette türkiye bilen iranning siyasiy, iqtisadiy we xelqara munasiwetlerdiki munasiwiti intayin mustehkem bolup, dölet mudapiesi we herbiy jehettiki hemkarliqnimu yenimu kücheytishke tirishiwatimiz.»

türkiye armiyesi bash qomandanliq ishtabining bashliqi hulusi aqar mundaq dédi: «iran bilen türkiye ottura sherq rayonidiki ikki muhim küch süpiti bilen diplomatik munasiwetliri hem hemkarliqni yenimu kücheytip, rayonda muqimliq hem tinchliq ornitish yolida özining rolini jari qildurushi mumkin. biz térrorizm we muqimsizliqqa qarshi küresh dairiside dost eller bilen, bolupmu iran bilen hemkarliqni yenimu kücheytishke teyyarmiz.»

amérikining «‹ AP› agéntliqi», «türkiye somalining paytextide herbiy telim - terbiye bazisi qurdi» serlewhilik xewiride, töwendiki uchurlarni oqurmenliri bilen ortaqlashti:

türkiye somalining paytexti mogadishoda afriqa qitesidiki eng chong herbiy telim - terbiye bazisini qurdi. türkiye armiyesidin 200 ofitsér yataq, meshq saheliri we türmilermu jaylashqan bazida 20 ming somali eskirini terbiyelep béridu.

melumatlargha qarighanda, eshshebab isyanchilirigha qarshi küresh qiliwatqan somali armiyesining afriqa elliri ittipaqining 22 ming kishdin teshkil tapqan tinchliq saqlighuchi qisimlirini kéler yili somalidin chékinip chiqip kétishtin burun döletning bixeterlikini kontrol astigha élishi shert iken.

gérmaniyede chiqidighan «‹ DİE WELT› géziti», «yawropa ittipaqi ishliri ministiri ömer chelik gérmaniye démokratiyesining türkiyege qerzdar ikenlikini éytti» serlewhilik xewiride, töwendiki melumatlargha orun ajratti:

yawropa ittipaqi ishliri ministiri ömer chelik madrid ziyaritide türkiyede 3 milyon köchmenning yashawatqanliqini tekitlep mundaq dédi: «eger biz yawropa ittipaqi bilen hemkarlashmighan bolsaq, bügünki künde bu 3 milyon köchmen yawropada yashawatqan bolatti. shunga gérmaniye démokratiyesi minnetdarliq bildürüsh jehettin bizge qerzdar. derweqe, eksiche bolghanda ashqun ongchil we solchil guruppilar saylamlarda téximu köp qollashqa érishken bolatti.»

u, yawropa ittipaqini 2016 – yilning bashlirida imzalanghan köchmenler kélishimige riaye qilmasliq bilen eyiblidi.

uning éytishiche, yawropa ittipaqi türkiye bilen köchmenler üchün 3 milyard yawro iane qilish toghruluq kélishim tüzgen bolsimu, emma yawropa ittipaqi köchmenler üchün peqet 800 milyon yawronila bergen. shu sewebtin, texminen 500 ming köchmen bala oqush pursitidin mehrum qalghan.

özbékistanda chiqidighan «‹jahon› géziti», «özbékistan – türkiye soda – iqtisad munbiri» serlewhilik xewiride, töwendiki melumatlarni oqurmenliri bilen ortaqlashti: özbékistan döletlik meblegh sélish komitéti bilen istanbul soda uyushmisi teripidin tashkentte «özbékistan – türkiye soda – iqtisad munbiri» yighini chaqirildi.

özbékistan muawin bash ministiri jemshid qochqarow riyasetchilikide bashlanghan yighinda, istanbul soda uyushmining bashliqi ibrahim chaghlar bilen türkiyening tashkent bash elchisi ehmed bashar shen échilish nutiqi sözlidi.

terepler yighinda, ortaq pilan layihelerni ishqa ashurushnimu öz ichige alghan türlük saheler boyiche özara menpeet yetküzüsh asasida hemkarliqni yenimu kücheytish yolida tashlinidighan qedemlerni chöridigen halda muzakire élip bardi.

 



مۇناسىۋەتلىك خەۋەرلەر