чәт әл мәтбуатлирида бу һәптә: 04.10.2017

бу һәптилик чәт әл мәтбуатлиридин таллап тәййарлиған муһим хәвәрлиримизниң қисқичә мәзмунлири төвәндикичә:

чәт әл мәтбуатлирида бу һәптә: 04.10.2017

түркийә авази радийоси: русийәдә чиқидиған «‹ Ria Novosti› гезити», «әрдоған түркийәниң йавропа иттипақиға әза болмисиму қилчә зийан тартмайдиғанлиқини ейтти» сәрләвһилик хәвиридә, төвәндики мәлуматларни оқурмәнлири билән ортақлашти:

җумһур рәис әрдоған йавропа иттипақиниң түркийәниң әзалиқиға көңүл бөлүшиниң зөрүрлүкини тәкитлиди һәмдә түркийәниң йавропа иттипақиға әза болмисиму қилчә зийан тартмайдиғанлиқини әскәртти.

әрдоған түркийә бүйүк милләт мәҗлисиниң 26 – қетимлиқ 3 – қанун чиқириш йили иш башлаш мурасимида қилған сөзидә, мундақ деди: «йавропа иттипақиниң муһим пиланлирини ишқа ашурушиниң бирдинбир йоли түркийәниң йавропа иттипақиға әзалиқидур. дәрвәқә, түркийә йавропаниң қудрәт тепишиға һәссә қошушқа вә йеңи пилан лайиһәлирини қоллашқа тәййардур. бирақ йавропа иттипақи башқа бир йолни таллиса, бу түркийәгә нисбәтән һечқанчә мәсилә әмәс. чүнки түркийә йавропа иттипақиға әза болмисиму қилчә зийан тартмайду, тәрәққий мәнзилгаһиға йетиш йолида давамлиқ илгириләйду.»

иранниң «<ирна> хәвәр агентлиқи», «руһани иран билән түркийәниң оттура шәрқ райониниң муқимлиқ мәнбәси икәнликини ейтти» сәрләвһилик хәвиридә, төвәндики учурларға орун аҗратти:

иран пирезиденти һәсән руһани түркийә армийәси баш қоманданлиқ иштабиниң башлиқи һулуси ақарни қобул қилғанда, түркийә билән иранниң оттура шәрқ районидики дост вә қериндаш дөләт икәнликини, җүмлидин икки дөләт мунасивәтлириниң барғансери тәрәққий қиливатқанлиқини тәкитләп мундақ деди: «нөвәттә түркийә билән иранниң сийасий, иқтисадий вә хәлқара мунасивәтләрдики мунасивити интайин мустәһкәм болуп, дөләт мудапиәси вә һәрбий җәһәттики һәмкарлиқниму йәниму күчәйтишкә тиришиватимиз.»

түркийә армийәси баш қоманданлиқ иштабиниң башлиқи һулуси ақар мундақ деди: «иран билән түркийә оттура шәрқ районидики икки муһим күч сүпити билән дипломатик мунасивәтлири һәм һәмкарлиқни йәниму күчәйтип, районда муқимлиқ һәм тинчлиқ орнитиш йолида өзиниң ролини җари қилдуруши мумкин. биз терроризм вә муқимсизлиққа қарши күрәш даирисидә дост әлләр билән, болупму иран билән һәмкарлиқни йәниму күчәйтишкә тәййармиз.»

америкиниң «‹ AP› агентлиқи», «түркийә сомалиниң пайтәхтидә һәрбий тәлим - тәрбийә базиси қурди» сәрләвһилик хәвиридә, төвәндики учурларни оқурмәнлири билән ортақлашти:

түркийә сомалиниң пайтәхти могадишода африқа қитәсидики әң чоң һәрбий тәлим - тәрбийә базисини қурди. түркийә армийәсидин 200 офитсер йатақ, мәшқ саһәлири вә түрмиләрму җайлашқан базида 20 миң сомали әскирини тәрбийәләп бериду.

мәлуматларға қариғанда, әшшәбаб исйанчилириға қарши күрәш қиливатқан сомали армийәсиниң африқа әллири иттипақиниң 22 миң кишдин тәшкил тапқан тинчлиқ сақлиғучи қисимлирини келәр йили сомалидин чекинип чиқип кетиштин бурун дөләтниң бихәтәрликини контрол астиға елиши шәрт икән.

германийәдә чиқидиған «‹ DİE WELT› гезити», «йавропа иттипақи ишлири министири өмәр чәлик германийә демократийәсиниң түркийәгә қәрздар икәнликини ейтти» сәрләвһилик хәвиридә, төвәндики мәлуматларға орун аҗратти:

йавропа иттипақи ишлири министири өмәр чәлик мадрид зийаритидә түркийәдә 3 милйон көчмәнниң йашаватқанлиқини тәкитләп мундақ деди: «әгәр биз йавропа иттипақи билән һәмкарлашмиған болсақ, бүгүнки күндә бу 3 милйон көчмән йавропада йашаватқан болатти. шуңа германийә демократийәси миннәтдарлиқ билдүрүш җәһәттин бизгә қәрздар. дәрвәқә, әксичә болғанда ашқун оңчил вә солчил гуруппилар сайламларда техиму көп қоллашқа еришкән болатти.»

у, йавропа иттипақини 2016 – йилниң башлирида имзаланған көчмәнләр келишимигә риайә қилмаслиқ билән әйиблиди.

униң ейтишичә, йавропа иттипақи түркийә билән көчмәнләр үчүн 3 милйард йавро ианә қилиш тоғрулуқ келишим түзгән болсиму, әмма йавропа иттипақи көчмәнләр үчүн пәқәт 800 милйон йавронила бәргән. шу сәвәбтин, тәхминән 500 миң көчмән бала оқуш пурситидин мәһрум қалған.

өзбекистанда чиқидиған «‹җаһон› гезити», «өзбекистан – түркийә сода – иқтисад мунбири» сәрләвһилик хәвиридә, төвәндики мәлуматларни оқурмәнлири билән ортақлашти: өзбекистан дөләтлик мәбләғ селиш комитети билән истанбул сода уйушмиси тәрипидин ташкәнттә «өзбекистан – түркийә сода – иқтисад мунбири» йиғини чақирилди.

өзбекистан муавин баш министири җәмшид қочқаров рийасәтчиликидә башланған йиғинда, истанбул сода уйушминиң башлиқи ибраһим чағлар билән түркийәниң ташкәнт баш әлчиси әһмәд башар шән ечилиш нутиқи сөзлиди.

тәрәпләр йиғинда, ортақ пилан лайиһәләрни ишқа ашурушниму өз ичигә алған түрлүк саһәләр бойичә өзара мәнпәәт йәткүзүш асасида һәмкарлиқни йәниму күчәйтиш йолида ташлинидиған қәдәмләрни чөридигән һалда музакирә елип барди.

 



مۇناسىۋەتلىك خەۋەرلەر