chet el metbuatlirida bu hepte: 14.06.2017

bu heptilik chet el metbuatliridin tallap teyyarlighan muhim xewerlirimizning qisqiche mezmunliri töwendikiche:

chet el metbuatlirida bu hepte: 14.06.2017

engliyediki roytérs xewer agéntliqi «erdoghan qatarning yétim qaldurulushi islam rohigha zit,dédi »serlewhilik xewiride oqurmenlirining diqqitige munu uchurlarni sundi: «türkiye jumhur reisi rejep tayyip erdoghan qatarning qoshna döletler teripidin yétim qaldurulushini qattiq eyiblep, buning islamning rohigha zit bolidighanliqini éytti. erdoghan adalet we tereqqiyat partiyesining parlamént guruppa yighinida söz qilip mundaq dédi:<qatar mesiliside éghir xataliq ötküzüldi, bir döletning xelqini her jehettin pütünley yétim qaldurush insaniyliqqa sighmaydu, goya qatarni ölümge mehkum qilghandek ishlar boldi. qatar térrorluq teshkilati daéshqa qarshi küreshlerde türkiye bilen bir septe turup aktip küresh qilip keldi, qatargha töhmetlerni chaplap bu döletni eyibleshning rayon döletlirige héchqandaq paydisi yoq>. seudi erebistan, behreyin, ereb birleshme xelipiliki we misir qatarliq döletlerning qatargha éghir imbargolarni qoyup 8 kündin ötkendin kéyin, erdoghanning qatar kirizisi toghruluq bergen bu bayanati qatarning rayonda yalghuz emeslikini  we küchlük ittipaqdéshining barliqini körsitip béridu.»

italiyediki SKANEWSgéziti «erdoghan iraq kürt rayonluq hakimiyitining musteqilliq référandumi tehdittur, dédi»serlewhilik xewiride munu uchurlarni oqurmenliri bilen ortaqlashti: «bu yil 25-séntebirde iraq kürt (kord)rayonluq hakimiyitide référandum ötküzülidighanliqi toghruluq tarqalghan xewerlerge naraziliq bildürgen rejep tayyip erdoghan, bu heqte toxtilip mundaq dédi:<shimaliy iraqning musteqilliq yolida tashlighan bu qedimi éghir xataliq bolup,  bu  ehwal iraqning zémin pütünlikige tehdittur>, bundaq référandumning héchkimge paydiliq emeslikini alahide eskertip ötken rejep tayyip erdoghan yene mundaq dédi: <iraqning zémin pütünlikini dawamliq yaqlap kelduq, buningdin kéyinmu yaqlashni dawamlashturimiz>.»

iran pars xewer agéntliqi «türkiye bilen süriyede toqunushsiz rayonlarni berpa qilish mesilisi üstide kélishtuq»serlewhilik xewiride munu uchurlargha orun ajratti: «iran tashqi ishlar ministirliqi bayanatchisi behram qasimi heptilik muxbirlarni kütüwélish yighinida tashqi ishlar ministiri muhemmed jewad zarifning türkiye ziyaritide süriye mesilisi üstide bir qisim kélishimlerning hasil bolghanliqini bildürdi. qasimi türkiye bilen süriyede toqunushsiz rayonlar berpa qilish mesilisi üstidimu kélishim hasil qilghanliqlirini we nöwette bu mesilide ilgirilesh körülgenlikini éytti. qasimi meyli astana muzakiriliride bolsun meyli bashqa ehwallarda bolsun iranning  türkiye bilen muhim ishlarni wujudqa chiqiralaydighanliqlirigha ishinidighanliqini alahide eskertip ötti.»

engliyediki el hayat géziti «misir suweyish qanilini türkiyening urush paraxotlirigha taqiwetmeydu»serlewhilik xewiride munu uchurlarni oqurmenliri bilen ortaqlashti: «misir türkiye bilen qatar otturisida tüzülgen mudapie kélishimining rohi boyiche qatargha qarap yolgha chiqqan türkiye urush paraxotlirining suweyish qanilidin ötüshige ruxset bérish yaki bermesliki mesilisi toghruluq bayanat bérip, suweyish qanilining xelqaraliq ötüsh éghizi bolushtek alahidiliki bolghanliqtin urush paraxotlirining suweyish qanilidin ötüshige tosalghu bolghili bolmaydighanliqini bildürdi. lékin mundaq mustesna bir ehwal bar: nawada misir bilen melum bir dölet urush halitige kirgen bolsa u döletning urush paraxotlirigha suweyish qanilidin ötüshige ruxset qilinmaydu, ereb döletlirining qatarni bayqut qilish qarari urush haliti bilen munasiwiti yoqliqidin, shunga suweyish qanilidin urush paraxotlirining ötüshige tosqunluq qilinmaydu.»

gérmaniyediki DEUTSCHE WELLE géziti «mérkél  rayon döletlirini qatar kirizisige chare tépishqa chaqirdi»serlewhilik xewiride munularni eskertti: «gérmaniye bash ministiri angéla mérkél qatar kirizisige chare tépish üchün pars qoltuqi döletliridin sirt iran we türkiyeningmu hemkarliq ichide heriket qilishi lazimliqini éytti. méksika ziyaritide söz qilghan angéla mérkél rayondiki döletler birlikte heriket qilmay turup qatar kirizisining hel bolmaydighanliqini bildürdi. qatar kirizisining hel bolushi üchün pars qoltuqi hemkarliq kéngishige eza döletlerning hemkarliq ichide heriket qilishining tolimu muhim ikenlikini alahide eskertip ötken mérkél:<süriye, iraq we liwiyedikige oxshash, bezi döletler muzakirilerning sirtida qalghan ehwalda kirizislerning siyasiy jehettin hel qilinishi mumkin emes, shunga qatar kirizisining hel qilinishida türkiye bilen iranning roli tolimu muhimdur>dédi.»



مۇناسىۋەتلىك خەۋەرلەر