عوامی رائے کو دبانا آمریت کے مترادف ہے، مریم نواز

نواز شریف (ن) لیگ کے صدر بھی رہیں گے اور اگلے وزیر اعظم بھی بنیں گے

917335
عوامی رائے کو دبانا آمریت کے مترادف ہے، مریم نواز

سابق وزیر اعظم نواز شریف کی صاحبزادی مریم نواز نے کہا ہے کہ پوری ن لیگ کو بطور جماعت سینیٹ الیکشن سے باہر کر دیا گیا  ہے۔

سرگودھا میں سوشل میڈیا کنونشن سے مریم نواز نے خطاب کرتے ہوئے کہا ہے کہ عوام پر اپنی رائے مسلط کرنا آمریت  کے علاوہ اور کچھ نہیں ہے۔ نواز شریف سے پہلے وزارت عظمیٰ چھینی گئی اور اب  پارٹی صدارت بھی چھین لی گئی، ان عقلمندوں کو سمجھاؤ کہ نواز شریف کی محبت دل میں ہےآئندہ انتخابات میں بھی ن لیگ ہی کامیابی حاصل کرے گی۔ انہوں نے کہا آج عوام کی  عدالت میں پاکستان کا مقدمہ لائی ہوں۔

مریم نواز نے کہا  کہ یہ کبھی  نہیں ہوا کہ پوری کی پوری جماعت کو سینیٹ انتخابات سے باہر کرد یا  ہو اور وہ جماعت جو پاکستان کی سب سے بڑی سیاسی جماعت ہے۔ یہ مذاق جو پاکستان مسلم لیگ (ن) کے ساتھ ہوا ہے یہ اصل میں عوام کے ووٹ کی پرچی پر ڈاکے کے مترادف  ہے۔

انہوں نے جس طرح خیبر سے کراچی تک عوام نے نواز شریف کا مقدمہ لڑا ہے وہ اس بات کا ثبوت ہے کہ وہ بے قصور ہیں اور ہمارے خلاف 2 سال سے بدعنوانی کا راگ الاپ رہے ہیں لیکن 5 روپے کی بھی کرپشن ثابت نہیں ہوئی۔

انہوں نے کہا کہ نواز شریف وہ  واحد شخص ہیں جو 2 بار وزیر اعظم اور 3 مرتبہ وزیر اعلیٰ بنے اور انہوں نے سی پیک، بجلی گھر، میٹرو بس اور دیگر بڑے منصوبے لگائے اور اگر ان منصوبوں میں کرپشن ہوتی تو کوئی نہ کوئی اسے سامنے ضرور لاتا۔کسی جج نےآج تک یہ نہیں کہا کہ نواز شریف نے 10 روپے کی بھی کرپشن کی ۔

ان کا کہنا تھا کہ نواز شریف اور (ن) لیگ کی طاقت میں کمی نہیں بلکہ اضافہ ہوا اور اب لاڈلہ بھی کہنے پر مجبور ہوگیا ہے کہ سپریم کورٹ نے یہ کیا فیصلہ دیا ہے۔

مریم نواز نے عوام سے  مخاطب ہوتے  ہوئے کہا کہ آئندہ عام انتخابات میں ووٹ صرف اسے دینا جس کے کندھے پر نواز شریف کا ہاتھ ہو اور نواز شریف (ن) لیگ کے صدر بھی رہیں گے اور اگلے وزیر اعظم بھی بنیں گے۔

ان کا کہنا تھا کہ نواز شریف 22 کروڑ عوام کے حق اور ووٹ کی حرمت کی جنگ لڑ رہے ہیں اور انہوں نے سب کو بتا دیا کہ ووٹ دینے والے عوام کی بھی کوئی عزت ہوتی ہے اور یہ آزمائش کی گھڑی پورے پاکستان کے لیے ہے۔



متعللقہ خبریں