تۆرکیأنینگ گۆن ترتیبی ۲۷: درعاداقی دأکی یاغدایلار

سیاسات، ایقدیصادیه‌ت و جمغیت غازناسی- ستانینگ عیلمی بارلاغچیسی، یازیجی جان آجون ینگ مسئله بۇیونچا سینینی اۇقایارسینگیز:

سوریأنینگ گۆن اۇرتاسیندا روسیا و ایران تاراپیندان قۇلدانیان حؤکۆمته دگیشلی           گۆیچلرینگ درعا شأهِرینه قورایان هۆجۆملری دۇوام ادیأر. سوریه لی محالیفلارینگ گؤزه‌گچیلیگیندأکی و سوریه دأکی آغدارلیشیغینگ باشلان یری بۇلان درعا شأهِرینه قورایان هۆجۆملرده حؤکۆمته دگیشلی گۆیچلر اولی اۆستۆنلیک قازانان بۇلسا، آسودا ایلات اردن سرحدینه قاچدی. اردن ینگ سرحت گچلگه سینی آچماندیغی سبأپلی اردن- سوریه سرحدینده آغیر پاجیغا دۇوام ادیأر. سوریه لی حاربی محالیفلارینگ حؤکۆمته قارشی بیله لیکده حرکت اتمه یأنلیگی و کأبیر تۇپارلارینگ روسیانینگ آراچیلیغی نتیجه سینده حؤکۆمت بیلن ایلالاشماغی سبأپلی کؤپ سانلی شأهِر ساواشسیز یاغدایدا حؤکۆمته دگیشلی گۆیچلرینگ گؤزه‌گچیلیگینه گچدی. گۆن اۇرتا سوریه دأکی واقالارینگ بیله کی بیر تاراپی بۇلسا اسرائیل – ایران دارتغینلیغی. ایران تاراپیندان قۇلدانیان یاراغلی تۇپارلارینگ اسرائیل سرحدینه یاقینلاشماغی ایکی یوردونگ آراسینداقی دارتغینلیغی یۇقارلاتدی.

ایون آیی نینگ باشیندا سوریأنینگ حؤکۆمتی نینگ درعا شأهرینه حرکت قوراماق اۆچین طایارلیق گؤریأندیگی بارادا حابارلار چیقماغا باشلاپدی. سۇنگ بۇلسا حؤکۆمتینگ حاربی طایارلیقلاری و گتیریلن قۇشماچا گۆیچلر حرکتینگ قورالجاقدیغینی گؤرکِزدی. گچن ییلاردا درعادا حؤکۆمته دگیشلی گۆیچلر بیلن اپوزیسیون گۆیچلرینگ آراسیندا گۆیچلی چاقنیشیقلار و ساواشلار بۇلدی. شیله لیکده روسیا و آمریکا بؤلگه بۇیونچا ایلالاشیپ بؤلگأنی دارتغینلیغی آزالدیش زۇلاغی حؤکمۆنده ایغلان اتیلر. اِمما حؤکۆمتینگ اپراسیالاری باشلاجاق واغتی آمریکالی یۇلباشچیلارینگ سوریه لی محالیفلاری قۇراپ بیلمه‌جکدیگی و سیاسی حمایاتینی چکندیگی حابار بریلیپدی. آمریکانینگ اردن داقی ایلچیحاناسیندان سوریه لی محالیف تۇپارلارینگ یۇلباشچیلارینا اوغرادیلان جارنامادا أهلی ایلالاشیقلارا و بریلن سؤزلره قارامازدان آمریکانینگ روسیادان و حؤکۆمته دگیشلی گۆیچلردن قوراماجاقدیغی بیالن ادیلیپدی. درعادا روسیانینگ و سوریأنینگ حؤکۆمتینگ اۇپراسیاسی نینگ باشلاماغیندان سۇنگ روسیانینگ حمیمیم بازاسیندان درعا دارتغینلیغی آزالدیش زۇلاغی نینگ بس ادیلندیگی بارادا بیانات بریلدی.

درعا اترابی نینگ یاشاییجیلاری نینگ اوزاق ییلاردان بأری بیله کی اتراپلارا سر ادیلنده آسودا و پاراحاتچیلیقلی شرطلرده یاشاندیغی سبأپلی ایلاتینگ اساسی بؤله گی اؤز اِرلرینده یاشایاردی. اِمما روسیا، ایران و سوریأنینگ حاربی گۆیچلری نینگ درعا حاربی اۇپراسیا باشلاتماغی، هۇوا هۆجۆملرینی قوراماغی بیلن اتراپدا اولی گؤچ ادیلشیک تۇلقونی عمله گلدی. ۲۷۰ مۆنگدن قۇوراق آدام اؤیلرینی ترک اتدی. ترک ادنلردن ۴۰ مۆنگ سوریه لی نینگ اردن سرحدینه باریپ اردنا گچمأگه سینانشاندیغی بیرلشن میللتلر قوراماسی تاراپیندان بیان ادیلیپدی. ۶۵۰ مۆنگ سوریه لی بۇسغونی قابول ادن اردن سوریه دن باشغا بۇسغون آلماجاقدیغینی بیان اتدی.

اردن سرحدینگ بیله کی تاراپیندان سوریه لیلر اۆچین نأچه کؤمِک بریأن هم بۇلسا، حؤکۆمته دگیشلی گۆیچلرینگ درعا اترابیندا اؤنگه سۆیشمه گی آسودا ایلات اۆچین اولی حۇوپ دؤره‌تدی. شیله لیکده بیرلشن میللتلر قوراماسی اردنا گۆمرۆک قاپیلارینی آچماغی اۆچین چاغیریش اتدی.

حاربی تایدان درعادا روسیا، ایران و سوریأنینگ گۆیچلری بیلن سوریه لی محالیفلارینگ آراسینداقی چاقنیشیقلار دۇوام ادیأر. حؤکۆمته دگیشلی گۆیچلر قیسغا واغتدا بیر اترابی اله گچیردی. کؤپ سانلی محالیف تۇپار بۇلسا روسیانینگ آراچیلیق اتمه گینده حؤکۆمت بیلن ایلالاشدی. داعل، بصرالشام و ابتا شأهِرلریندأکی محالیفلار یاراغلارینی و شأهِری حؤکۆمته دگیشلی گۆیچلره تابشیردی. بیله کی تاراپدان روسیانینگ یۇقاری هۇوا قۇلداوی و آمریکانینگ کؤمِگینی بس اتمه گی یاراغلی گؤره شی دۇوام اتدیریأن سوریه لی محالیفلاری گۆیچدن دۆشۆردی.

گۆن اۇرتا سوریه دأکی واقالارینگ تأثیرینده قالیان بیله کی بیر یورت بۇلسا اسرائیل. اسرائیل محالیفلاردان اۇزال روسیا بیلن گپله شیکلر گچیریپ، ایران ینگ و اۇنونگ یارانلاری نینگ اۇپراسیا قاتناشمازلیغی بارادا ایلالاشاندیغی بیلینیأر. اِمما باشدان گچیریلیأن واقالار ایرانینگ و اۇنونگ یارانلاری نینگ اۇپراسیا قاتناشاندیغینی گؤرکِزیأر. اسرائیل ینگ ایرانا و یارانلارینا بیر نأچه گِزِک هۇوا حرکتینی قوراماغی و ایران ینگ تاراپیندا دوریان یاراغلی تۇپارلارینگ اسرائیل سرحدینه قۇلایلاماغی ایکی یوردونگ آراسیندا باشغا دارتغینلیقلارینگ یۆزه چیقماغینا سبأپ بۇلوپ بیلر.

سیاسات، ایقدیصادیه‌ت و جمغیت غازناسی- ستانینگ عیلمی بارلاغچیسی، یازیجی جان آجون ینگ مسئله بۇیونچا سینینی اۇقادینگیز.