“ABŞ-na gurajak saparym iki taraply gatnaşyklarda öwrülşik nokady bolar"
Prezident R. T. Erdogan aýralykçy terror guramasy PKK/PÝD-ä goldaw bermegiň ABŞ-na gelişmeýändigini aýtdy
Erdogan Hytaý Halk Respublikasyna gitmezinden ozal Ankaranyň Esenboga adyndaky howa menzilinde gün tertibiniň ileri tutulýan ugurlary hakynda beýanat berdi.
Hytaý Halk Respublikasyndan soň maý aýynyň 15-17-i aralygynda ABŞ-na gitjekdigini aýdan Erdogan “ABŞ geçiş döwrüni başdan geçirýär. Şol geçiş döwründe biz has ünsli bolmalydyrys. ABŞ-dan ÝPG-ä berilýän agyr ýaraglar ýönekeý ýaraglar däldir. Şol ýaraglar hakynda doly maglumatymyz bar we muny ABŞ hem kabul edýär. ABŞ-nyň ÝPG-ä ýarag kömegini bermegi Türkiýe bilen ABŞ-nyň arasyndaky strategik gatnaşyklara bap gelmeýär we bu meseläni ara alyp maslahatlaşarys” diýdi.
Türkiýäniň terror guramasy DAIŞ-e garşy ýokary göreşini dowam etdirýändigini aýdan Prezident Erdogan, DAIŞ-e garşy göreşýändigini aýdan beýleki ýurtlaryň sözleriniň bolsa diňe boş gürrüňlerdigini belledi.
Erdogan Türkiýäniň ýurduň içinde we daşynda DAIŞ-e, PKK-a, PÝD/ÝPG-ä garşy tutanýerli göreşini dowam etdirýändigini nygtady.
Siriýanyň demirgazygynda terrorçylar bilen düşen foto suratlary ýüze çykan ABŞ-na we Russiýa hem garşylyk görkezen Erdogan; “Bu sebitde ABŞ-na we Russiýa abanýan howp ýok. Emma Türkiýe howp astynda. Türkiýe bilen ABŞ NATO agza ýurt. NATO-nyň çäginde hyzmatdaşlyk edilen halatynda şeýle güýçli ýurt güýçli hyzmadaşy bilen sebitde biziň bilen has netijeli işleri durmuşa geçirip biler. Terror guramasyna goldaw bermek ABŞ-na gelişmeýär. Bu ýerlikli däl” diýdi.
Fetullahçy terror guramasy FETÖ-niň ýolbaşçysynyň yzyna berilmegi etaby hakynda hem durup geçen Erdogan; “Jenap Tramp bilen meseläni giňişleýin ara alyp maslahatlaşaryn. Täze subutnamalar bar şolary gowşurarys. Bu meselede Trampyň tutumy diýseň möhüm” diýdi.
Prezident Erdogan “ABŞ-na gurajak saparymyň iki taraply gatnaşyklarda öwrülşik nokady bolmagyny isleýärin” diýdi.