Saud Arabystany Amerikan Senadynyň Kaşykçy bilen bagly kararyna nägilelik bildirdi

Saud Arabystanynyň hökümeti Amerikan Senadynyň kararynyň esassyz we subutnamasyz öňe sürmeler netijesinde kabul edilendigini belledi.

Saud Arabystanynyň Daşary işler ministrliginden berilen beýanatda, ABŞ-niň Senadynyň saud žurnalist Jemal Kaşykçy jenaýaty bilen bagly karar taslamasy berk ýagdaýda tankyt edildi, ikitaraplaýyn gatnaşyklaryň ähmiýetine ünsler çekildi.

Beýanatda: “Saud Arabystany ABŞ-niň Senadynyň ýakyn wagtda orta goýan esassyz, hakykata bap gelmeýän öňe sürmelerden gözbaş alýan, resmi Riýadyň içerki işlerine deňagramsyz ýagdaýda goşulyşýan we Saud Arabystany Şalygynyň sebitleýin, halkara abraýyna zeper ýetirýän pozisiýasyny ret edýär” diýip habar berildi.

Resmi Riýadyň ABŞ bilen hyzmatdaşlyk etmekde isleglidigi aýdylýan beýanatda, dostlukly bir ýurdyň kanun çykaryjy organyndan gelen karara alada bildirilýändigi mälim edildi.

Beýanatda Saud Arabystanynyň içerki işlerine goşulyşmagy, hökümetini, Şasyny we Mirasdar Şazadasyny töhmediň astynda sokjak we kemsidýän islendik günäkärlemäni ret edýändigi beýan edildi.

Riýadyň sebiti wekilleriniň üsti bilen durnuksyzlaşdyrýan Eýranyň erbetlikleriniň garşysynda Waşingtonyň ýanyndadygy aýdylýan beýanatda, Kaşykçy jenaýatynyň adalatly ölçeginden daşary bir karara getirilmek baradaky tagallalaryň kabul edilmejekdigi habar berildi.

Saud Arabystanynyň Stambuldaky Baş konsullygynda öldürilen saud arabystanly žurnalist Kaşykçy jenaýaty babatynda Mirasdar Şazada Muhammed Bin Selmany jogapkär hökmünde görýän kanun taslamasy, Amerikan Senadynda geçen hepde kabul edilipdi.