روسیانی محروم ائتدیلر

دوما ملت وکیلی ایگور لئبئدئو، قرارین گوج‌لو بیر دؤولت مؤوقعیتینده اولان روسیا اوچون "آلچالدیجی" اولدوغونو ساووندو

روسیانی محروم ائتدیلر

اولوسلارآراسی المپیک کمیته‌سی، روسیانی ۲۰۱۸ قیش المپیک اویونلارین‌دان محروم ائتدی.

سوئیسین لوزان شهرین‌ده‌کی المپیک ایجرا کمیته‌سینین توپلانتی‌سینین آردین‌دان وئریلن یازی‌لی آچیقلامادا، روسیانین ۲۰۱۸ پیونگ چانگ قیش المپیک اویونلارین‌دان قاداغان ائدیلدیگی بیلدیریلدی.

آچیقلامادا، دوپینگ تستلری تمیز چیخان روس یاریشچیلارین ایسه ۲۰۱۸ قیش المپیک اویونلارینا مستقیل اولاراق قاتیلماسینا ایجازه وئریلدیگی قید ائدیلدی.

روس یاریشماچیلارین، ۲۰۱۸ قیش المپیک اویونلارین‌دا "روسیادان قاتیلان المپیک آتلئت" آدی ایله یاریشاجاغی ایفاده ائدیلدی.

روسیا مقاملاری ایسه قرارا "سرت" تپکی گؤستردی.

روسیا مقاملاری، اولوسلارآراسی المپیک کمیته‌سینین، روسیانین ۲۰۱۸ قیش المپیک اویونلارین‌دان منع ائدیلمه‌سینه و دوپینگ تستلری تمیز چیخان روس آتلئتلرین مستقیل اولاراق اویونلاردا یاریشماسینا قارشی قرارینی دگرلندیردی.

روسیا فوتبال فدراسیونو یؤنتیم قورولونون عضوو و دوما ملت وکیلی ایگور لئبئدئو، کمیته طرفین‌دن وئریلن قرارین گوج‌لو بیر دؤولت مؤوقعیتینده اولان روسیا اوچون "آلچالدیجی" اولدوغونو ساووندو.

روسیانین پیونگ‌چانگ قیش المپیک اویونلارینا قاتیلماغی بایکوت ائتمه‌سی لازیم اولدوغونا ایشاره ائد‌ن لئبئدئو،

"بو نقطه‌ده وئریله‌جک ان یاخشی قرار المپیک اویونلاری بایکوت ائتمک‌دیر. بئله‌لیکله روسیانین گوجونو گؤسترمک. المپیک اویونلارینا قاتیلماغیمیز ایسه ضعیف‌لیک علامتی اولاجاق‌دیر" دئدی.

روسیا المپیک کمیته‌سینین باشقانی آلکساندر ژوکوو ایسه روس آتلئتلرین سون ایکی ایلدیر اولوسلارآراسی قوروملار طرفین‌دن دوپینگ ایستیفاده‌سینه دایر گؤزلم آلتین‌دا توتولدوغونو بیلدیردی،

"بوتون بو گؤزلم مدتین‌ده روس آتلئتلرین دوپینگ ایستیفاده ائتمه‌دیکلری گؤرولموش‌دور و روس آتلئتلرین بو دؤورده آلدیقلاری بوتون اوغورلار دا دوروستجه آلینمیش‌دیر" دئیه دانیشدی.

روسیا دؤولت تلویزیونو و رادیو یایین شیرکتی طرفین‌دن ائدیلن آچیقلامادا دا روس تیمینین ایشتیراک ائتمه‌مه‌سی حالین‌دا روسیادا المپیک اویونلارینا دایر یایین اولمایاجاغینی آچیقلادی.



ایلگیلی‌لی خبرلر