چینه، دوغو تورکوستان اویاریسی
چینین اویغور تورکلرینه قارشی یئریتدیگی باسقیچی سیاستلرله اولوسلارآراسی نورمالاری پوزدوغو بیلدیریلدی
آمریکا خاریجی ایشلر باخانی مایک پومپئو، چینین اویغور تورکلرینه قارشی یئریتدیگی باسقیچی سیاستلرله اولوسلارآراسی نورمالاری پوزدوغونو بیلدیردی.
باخان پومپئو، اویغور اؤزارک بؤلگه‌سین‌ده باش وئره‌نلره دایر سوسیال مئدیا حسابی تویتردن یازی‌لی آچیقلاما وئردی.
چینین اویغورلارا قارشی توپلو حبسلره داوام ائتدیگینی خاطیرلادان پومپئو،
"اویغور تورکلرینه یؤنه‌لیک توپلو توتوقلاما و یوخا چیخما حاللارینا دایر گوونلی راپورلار گلمه‌یه داوام ائدرکن، چینه، اولوسلارآراسی نورمالاری و اؤز قانونلارینی پوزان بو باسقیچی تاکتیکلره سون وئرمه چاغریمی تکرار ائدیره‌م" ایفاده‌لرینی ایشلتدی.
چین‌ده سون ایللرده اویغور تورکلرینین یاشادیغی اویغور اؤزارک بؤلگه‌سین‌ده تحصیل مرکزی آدی آلتین‌دا فعالیت گؤستره‌ن دوشرگه‌لر ایله اویغورلارین کیم‌لیک و مدنیتلرینه قارشی پوزونتولار اولوسلارآراسی توپلوم طرفین‌دن تنقید ائدیلیر.
بیرلشمیش میللتلر اینسان حاقلاری شوراسینا عضو ۲۲ اؤلکه، ۱۱ جولایدا چینین، دوغو تورکوستاندا اویغور و دیگر آزلیقلارا قارشی رفتارینی تنقید ائد‌ن و توپلو گؤزآلتیلارین دوردورولماسی چاغریسی ائد‌ن مکتوب ایمضالامیشدی.
اینسان حاقلاری ایزله‌مه هؤرگوتونون (HRW) راپورون‌دا، سون ۲ ایلده اویغور اؤزارک بؤلگه‌سین‌ده چوخ ساییدا اینسانین "اؤنله‌ییجی پلیسی تدبیر" آدی آلتین‌دا سوچسوز یئره ساخلانیلدیغی و سیاسی باخیم‌دان تهلوکه‌لی حساب ائدیله‌ن شخصلرین هر هانسی بیر محکمه قراری اولمادان توپلاما کمپ‌لرینه گؤندریلدیگی بیلدیریلمیشدی.
