نظربایئو آنلاشما‌نی امضالادی

قازاقیستان پارلمانی آنلاشمایا گئچه‌ن هفته اونای وئرمیشدی

نظربایئو آنلاشما‌نی امضالادی

قازاقیستان پرزیدنتی نورسلطان نظربایئو، خزر دنیزینین حقوقی ایستاتوسو ایله باغلی آنلاشما‌نین تصدیق ائدیلمه‌سی باره‌ده قانونو امضالادی.

آنلاشما، خزر یانی اؤلکه‌لر قازاقیستان، آذربایجان، روسیا، ایران و تورکمنیستان طرفین‌دن آگوست آیین‌دا امضالاندی.

آنلاشما‌نین سؤزوگئدن اؤلکه‌لرین پارلمانلاری و دؤولت باشقانلارینین اونایندان گئچمه‌سی گؤزلنرکن، قازاقیستان پارلمانی آنلاشمایا گئچه‌ن هفته اونای وئرمیشدی.

آنلاشما‌یا گؤره طرفلره، خزر دنیزین‌ده اگمنن‌لیک، منحصر حاقلار و یارغی صلاحیتی تانیناجاق.

طرفلرین، خزر دنیزیینده‌کی فعالیتلری، اگمن‌لییه، تورپاق بوتؤولویونه، موستقیل‌لییه، برابرلییه سایغی، گوج و تهدیدلرین ائدیلمه‌مه‌سی، امکداش‌لیق و ایچ ایشلره قاریشماما پرینسیپلری اساسین‌دا یئریدیله‌جک.

خزر دنیزی ایله باغلی بوتون پروبلئملر باریش یولو ایله حل اولوناجاق.

خزریانی اؤلکه‌لردن باشقا، دنیزده خاریجی حربی گوج‌لرین اولمایاجاغی وورغولانان آنلاشما‌یا گؤره، طرفلر، بورادا دنیزچی‌لیک، بالیق‌چی‌لیق، بیولوژیک قایناقلارین ایستیفاده‌سی و قورونماسی، معدن کشف و اورتیم و دیگر فعالیتلری ائده‌جک.

آنلاشما‌یا گؤره، خزر دنیزی، ایچ سو ساحه‌لرینه، محلی سولارا، بالیق‌چی‌لیق ساحه‌لرینه و عمومی سو مکانینا بؤلونه‌جک، هر بیر طرف، آنلاشما‌یا اویغون اولاراق تعیین اولونان سرحددن ۱۵ دنیز میلی مسافه‌یه قدر اؤز سو سرحدلرینی معیینلشدیره‌جک.

خزر دنیزینین دیبی و تورپاق آلتینین سئکتورلارا بؤلونمه‌سی، اولوسلارآراسی حقوق و نورمالار نظره آلیناراق قونشو و قارشی قارشییا یئر آلان اؤلکه‌لر آراسین‌دا آنلاشیلاراق باش توتاجاق.

دنیزه ساحلی اولان اؤلکه، صنعی آدالاری، تاسیسلری و یاپیلاری تیکمه و ایستیفاده ائتمه حاقینا صاحب اولاجاق.

هر بیر طرف، ۱۰ دنیز میلی ائنین‌ده بالیق‌چی‌لیق ساحه‌سی یاراداجاق و بو بؤلگه‌ده بالیق اوولاماق حاقینا صاحب اولاجاق.

طرفلر آنلاشما‌یا اساساً، خزر دنیزینین دیبینه سوآلتی کابللاری و اساس بورو خطلرینی، اولوسلارآراسی آنلاشما‌لاردا معین ائدیله‌ن ایستانداردلارا اویغون اولاراق دؤشه‌یه‌جک.

خزر دنیزینین بیولوژیک زنگینلیگینه ضرر وئره‌جک فعالیتلرین قاداغان اولوناجاغی قید اولونان آنلاشمایا اساساً طرفلر، وئردیگی ضرر اوچون اولوسلارآراسی نورمالارا اویغون اولاراق مسئولیت آلاجاق.

طرفلر، اولوسلارآراسی تروریزم، یاسادیشی سلاح، اویوشدوروجو داشینماسی، دنیز یولو ایله کؤچمن قاچقین قاچاقچی‌لیغینی اؤنله‌مه‌نین یانی سیرا دیگر سوچلارا قارشی مباریزه آپارماق اوچون امکداش‌لیق ائد‌جک.



ایلگیلی‌لی خبرلر