تورک کنه‌شی اقتصاد باخانلاری توپلاندی

"قارداشلار اؤز آرالارین‌دا سیاحت ائدرکن ویزا اولمامالی‌دیر"

تورک کنه‌شی اقتصاد باخانلاری توپلاندی

اقتصاد باخانی نیهات زیبکجی، تورک دونیاسینین تیجاری ایلیشکیلرله داها گوجلو اولاجاغینی سؤیله‌دی.

تورک کنه‌شی/شوراسی اقتصاد باخانلاری ۷.جی توپلانتیسی ایستانبول‌دا گئچیریلدی.

توپلانتیدا کنه‌ش عضوو تورکیه، آذربایجان، قازاقیستان و قیرقیزیستانین یئتکیلیلرینین یانی سیرا رسمی عضو اولمایان اؤزبکیستان‌دان دا بیر باخان یاردیمچیسی قاتیلدی.

توپلانتینین آردین‌دان مطبوعات کنفرانسیندا دانیشان زیبکجی، آذربایجان ایله تورکیه آراسین‌دا ترجیحلی تیجارت آنلاشما‌سی مسئله‌سین‌ده چوخ سرعت‌لی ایرلیلییش اولدوغونو، ایلین سونون‌دا سونلاندیرجاقلارینی بیلدیردی.

زیبکجی، اوغورلو گئچن بو گؤروشمه‌ده اقتصادی-تیجاری امکداشلیغین گلیشدیریلمه‌سی، اورتاق یاتیریملارین آرتیریلماسی و قارشیلاشیلان پروبلئملرین حل ائدیلمه‌سی کیمی مسئله‌لرین دانیشیلدیغینی آنلاتدی.

زیبکجی، اقتصاد باخانلیقلارینین فعالیتلرینی و تیجارتین آرتیریلماسینی چوخ اؤنمسه‌دیکلرینی قید ائد‌رک، دونیا اقتصادینین چوخ سرعت‌لی دییشدیگی بیر شرایط‌ده تورک دؤولتلری اولاراق بو دییشیمه بیرلیک‌ده آیاق اویدوروجاقلارینی بیلدیردی.

۴ اؤلکه‌نین اؤز آراسین‌دا اولان تیجارت حجمینین تخمیناً ۵،۵ میلیارد دلار اولدوغونو دیله گتیره‌ن زیبکجی، بو رقمی ایلک فورصت‌ده ۱۰ میلیارد دلارا چیخارماغی اماجلادیقلارینی سؤیله‌دی.

تورک دونیاسینین نقلیات و لجستیک ساحه‌سین‌ده الین‌ده جدی ایمکانلار اولدوغونو دیله گتیره‌ن زیبکجی، بو پروژه‌لرده‌کی امکداش‌لیق ائتمه‌لری مسئله‌سین‌ده همفیکیر اولدوقلارینی وورغولادی.

زیبکجی، گؤروشمه‌لرده، تورک دونیاسی اورتاق آلت‌یاپی فوندونون اولوشدورولماسی ایله باغلی گؤروش آلیش وئریشی آپاریلدیغینی دئدی.

زیبکجی، گؤروشمه‌لرده، ایکی‌لی تیجارت و یاتیریم آنلاشما‌لارینین یئنی‌لنمه‌سی مسئله‌سینین دانیشیلدیغینی بیلدیره‌رک، قیسا مدت اؤنجه اؤزبکیستان ایله ایمضالادیقلاری یاتیریملارین قارشی‌لیق‌لی تشویقی و قورونماسی موقاویله‌سینین قیسا مدت‌ده عضو اؤلکه‌لر آراسین‌دا یئنی‌لنمه‌سی لازیم اولدوغونو، بونون تیجارت مانع‌لری قالدیراجاغینی سؤیله‌دی.

اورتاق بازار مسئله‌سین‌ده آذربایجانا باغلی اؤزارک ناخجیوان جمهوریتی ایله چوخ گؤزل بیر ایش بیرلیگی ایچری‌سین‌ده اولدوقلارینی دیله گتیره‌ن زیبکجی، ناخجیوان‌دا اورتیلن بوتون محصوللارین محدودیت اولمادان تورکیه‌یه گیرمه‌سینین قارشی‌سینی آچدیقلارینی، موبادیله‌لرده تورک لیراسی‌نین ایستیفاده ائدیلمه‌سینی توصیه ائتدیکلرینی بیلدیردی.

اؤلکه‌لر آراسی تیجارت‌ده میلی پول بیریملرینین ایستیفاده ائدیلمه‌سینین اؤنمینه توخونان زیبکجی، اؤزبکیستان ایله ده اقتصادی ایلیشکیلرده سون دؤورده سرعت‌لی ایرلیلییش اولدوغونو، بو اؤلکه‌ده یاتیریملاری دستکلدیکلرینی وورغولادی.

زیبکجی، اولکه‌لرآراسی ویزالارین قالدیریلماسینا دا توخوناراق،

"قارداشلار اؤز آرالارین‌دا سیاحت ائدرکن ویزا اولمامالی‌دیر. بو ویزالار قالدیریلان‌دا توریزمین داها دا جانلاندیغینی گؤرجکسینیز. آرخایینام کی، میلیونلارجا تورکیه وطنداشی آتا یوردلارینا گئده‌جک. بو توریزم‌ده بؤیوک حرکت‌لی‌لیک، تیجارت و سرمایه دئمک‌دیر. بو مسئله‌ده کیچیک اما داوام‌لی آددیملار آتاجاییق" دئدی.



ایلگیلی‌لی خبرلر