تورک دیش پولیتیکاسینا باخیشلار (23)

ساواشین دییشن دوغاسی

تورک دیش پولیتیکاسینا باخیشلار (23)

بیلگی سیستملرین‌ده‌کی سرعت‌لی گلیشمه‌لر و بو گلیشمه عینی سرعتله ساوونما تکنولوژیلری ایله بوتونلشمه‌سی گئتدیکجه ساواشین دا طبیعتینی دییشدیریر. بیز ده بو هفته پروگرامیمیزدا بو پروسه‌لری، ساواشین دییشن طبیعتینی و اورتا دوغونو تحلیل ائدجییک.

آتاتورک اونیورسیته‌سی اولوسلارآراسی ایلیشکیلر بؤلومو خوجا‌سی دکتر جمیل دوغاچ ایپک‌ین قونو ایله باغلی دگرلندیرمه‌سینی سونوروق.

...

ساوونما تکنولوژیلری و ساواشلارا قارشی یالانلار، تاریخ بویو تکنولوژی ایله ائش زامان‌لی اولاراق گلیشمه گؤستردی. یئنی تکنیک، آراج و متدلارین تطبیقی، دوشمنه قارشی اوستونلوک یاراتماق گیریشیمینین یانیندا داشیندیریجی‌لیغی تامین ائتمک اوچون ده بیر هدف اولاراق ثابت قالیر. آنجاق دیگر طرف‌دن، هر بیر یئنی‌لیک، بیر اولکی ساواش‌دان، یا دا چاتیشمادان آلینان درسلرله اولقونلاشیر.

بیلگی تکنولوژیلرینین چوخ سرعت‌لی گلیشیمی، ژئوسییاسی پروسه‌لر و دؤولتلرین یانین‌دا دؤولت خاریجی آکتورلارین دا اؤن پلانا چیخماسی، ساواش‌ین یئنی اصول، تاکتیک و سیستملرله داوام ائتمه‌سینی تامین ائدیر. یئنی نسیل ساواش آدلاندیراجاغیمیز بو یئنی یاناشیمدا داها کیچیک، حرکت قابیلیتی یوکسک، شبکه مرکزلی بیر یاپیدا بیر بیرینه باغلی بیرلیکلر؛ سیاسی، اقتصادی و اجتماعی حرکتلرین بیر پارچا‌سی کیمی ایستیفاده ائدیلیر.

یئنی نسیل ساواش‌ین ایلک نومونه‌لری اولاراق لیبی عملیاتی، سوریه ایچ ساواش‌سی، افغانیستان کیمی نومونه‌لری گؤسترمک اولار. بو نومونه‌لرده دؤولتلرین سیاسی و حربی هدفلری اوچون دؤولت دیشی آکتورلاردان ایستیفاده ائتدیکلرینی، ساواشین میدان‌دا و یا آچیق اعلان ائدیلمیش شکیل‌ده دئییل، "وکالت ساواش‌لاری" شکلین‌ده آپاریلدیغینی گؤروروک. پارتیزان ساواشی، دوزه‌ن دیشی اؤزل ساواش استراتژی‌لرینی اؤنه چکیر. بئله‌لیکله، تاکتیک و استراتژیک نتیجه اوچون پسیکولوژیک ساواش، الکترونیک ساواش، سایبری ساواش کیمی اصوللاردان ایستیفاده ائدیلیر.

ساوونما تکنولوژیلری و ساواش استراتژی‌لرینین معینلشدیریلمه‌سینده، تهدید اورتامی و محتمل عملیات شرطلری اساس معین ائدیجی عامللر. چاتیشما چیخماسی احتیمال ائدیله‌ن بؤلگه‌لر و اورتام شرایطینین تحلیلی، سلاح‌لی گوج‌لرین بو بؤلگه‌لرده گئچیرجگی عملیاتا، اورتام شرطلرینه و محتمل دوشمنلرین ایستعدادلارینا قارشی حاضرلیق ائتمه‌لری اوچون لازیم. گونوموزده دونیا اوزرین‌ده سیاسی، تاریخی، اقتصادی تمللر اوزرین‌ده شکیللنمیش چوخ ساییدا گرگین‌لیک، چاتیشما و بحران نقطه‌سی وار. بونلارین اؤنملی بیر قیسمی اورتا دوغو و اطرافین‌دا یئر آلیر.

۲۰۱۱.جی ایلده تونس‌ده باش وئره‌رک سرعتله قوزئی آفریقا و اورتادوغو بؤلگه‌سینه یاییلان و "عرب باهاری" آدلان‌دیریلان خالق حرکتلری، بؤلگه‌نین ژئوسیاسی دنگه‌لری اوزرین‌ده بؤیوک دییشیک‌لییه سبب اولدو. تونس، لیبی و مصرده رژیم دییشیک‌لیگی و سوریه‌ده ایچ ساواشا سبب اولان بو حرکتلر، بؤلگه‌ده موختلیف رادیکال سلاح‌لی قروپلارین فعالیتینی آرتیرماسینی دا تامین ائتدی. سوریه‌ده ۲۰۱۱.جی ایلده باشلایان وطنداش ساواشی، بؤلگه اؤلکه‌لرینین میلی گوونلیکلرینی بیرباشا تهدید ائدر حالا گلدی. بحرانین، بؤلگه اؤلکه‌لرینی ایچینه آلان بیر ساواشا، یا دا داها درین بیر بحرانا چئوریلمه‌سی ریسکی وار.

اورتادوغودا ان بؤیوک انرژی اورتیجیلریندن ایرانین یئریتمک‌ده وکالت ساواش سیاستی، بؤلگه اؤلکه‌لری اولدوغو قدر اولوسلارآراسی سیستم طرفین‌دن ده جدی تهدید کیمی قبول ائدیر. ایرانین اؤزللیکله اوزون منزیل‌لی راکت و موشک تکنولوژی‌لری ایله بصره کؤرفزین‌ده‌کی دنیز ترافیکینی انگلله‌یه‌بیله‌جک ماهیتده سیستملره یاتیرماقدا اولدوغو یاتیریم، بو تهدید حسینی گوجلندیریر. ایران ایله ایسراییل آراسین‌داکی گرگینلیین بیر چاتیشمایا چئوریلمه احتیمالی دا وار.

ساواشین دؤنوشومون‌ده و گلیشیمین‌ده هئچ شوبهه‌سیز تکنولوژی ان تعین ائدیجی رولو اوینادی و اویناماغا دا داوام ائدیر. بیلیم و تکنولوژینین ایر‌لیله‌مه‌سی بو معنادا، ایچین‌ده اولدوغوموز عصرین اورتالارینا دوغرو ایر‌لیله‌یه‌ن پروسه‌ده ساوونما ساحه‌سین‌ده بعضی تکنولوژی، سیستم و چؤزوملری اؤن پلانا چیخاریر. بونلار بیلیشیم- ایله‌تیشیم تکنولوژیلری و سایبری ساواش، بیوتکنولوژی، یؤنلندیریله‌بیلن انرژی، اینسان‌سیز ساواش سیستملری، ایرلی ماتریال و اورتیم تکنولوژیلری، سیمولاسیون و گؤرونتوله‌مه تکنولوژیلری ایله آلتئرناتیو گوج سیستملری و یاناجاق تکنولوژیلری‌دیر.

مشهور استراتژیست کارل فون کلاوزویتس، ساواشی سیاستین باشقا آراجلارلا داوامی کیمی دگرلندیریر. بو تعریف‌دن حرکتله ساواش و داها گئنیش بیر ایفاده ایله ساوونما قابیلیتینی میلی گوونلیک استراتژیسینین بیر عنصورو کیمی دگرلندیرمک لازیم‌دیر. اونسوز دا گئری‌ده بوراخدیغیمیز عصرلر بویو ایمپراتورلوقلار، دؤولتلر، ساواشدان سیاسی، اقتصادی و حربی پولیتیکالارینین بیر پارچا‌سی کیمی ایستیفاده ائتدیلر. بو گون حربی ایستعدادلارین، ساوونما تکنولوژیلرینین و ساواش استراتژی‌لرین گلیشیمی، تکنولوژی ایله بیرباشا باغلانتی‌لی. ساواشین یاخین و اوزاق گله‌جک‌ده نئجه باش وئرجگی؛ محتمل چاتیشما اورتام و شرطلری ایله دوشمنلرین الده ائتمه‌لری محتمل ایستعدادلارین اؤن گؤرولمه‌سی ائتکین ساواش گوجو آلماق اوچون لازیم. استراتژیک، اقتصادی، سیاسی و تکنولوژیک اؤن گؤرو قابیلیتی بیرلیک‌ده ایستیفاده ائدیله‌بیلیرسه مدرن احتیاجلارا جاواب وئره‌ن بیر ساوونما قابیلیتی اینشا ائتمک ممکن اولابیلر.

...

آتاتورک اونیورسیته‌سی اولوسلارآراسی ایلیشکیلر بؤلومو خوجا‌سی دکتر جمیل دوغاچ ایپک‌ین قونو ایله باغلی دگرلندیرمه‌سینی سوندوق.



ایلگیلی‌لی خبرلر