تورکیه پنجره‌سیندن اورتادوغو(36)

لبنان تورکمن‌لری

تورکیه پنجره‌سیندن اورتادوغو(36)

اورتادوغودا جدی ساییدا تورکمن وارلیغی‌نین اولدوغو اؤلکه‌لردن بیری ده لبنان. بیز ده بو هفته پروگرامیمیزدا لبنان تورکمن تحلیل ائدجییک.

آتاتورک اونیورسیته‌سی اولوسلارآراسی ایلیشکیلر بؤلوموندن دکتر جمیل دوغاچ ایپک‌ین مسئله ایله باغلی دگرلندیرمه‌سینی تقدیم ائدیریک:

لبناندا تورک وارلیغی‌نین کؤک‌لری 12.جی عصره دایانیر. آنجاق تورکیه جمهوریتی، رسمی اولا‌راق لبنان تورک‌لرین‌دن ایلک دفعه 1989.جو ایلده خبردار اولدو. لبنان اوردوسوندا عسگر اولان تورکمن خالد اسدین 1989.جو ایلده وظیفه‌سی سیراسیندا تورکجه دانیشدیغینی قوموتانی فرق ائدر. سوبایین خالد اسدی تورکیه ائلچیلیگینه آپارماسی ایله ایلک تماس قورولور. بیروت ائلچیسی ابراهیم دجله‌لی ایله گؤروشن اسد، کواشره کندین‌دن بیر تورکمن اولدوغونو دئییر. ائلچی کواشره کندینه گئدر و ایلک ارتباط قورولور. 1989دا لبنان ایچ ساواشی سببین‌دن ائلچینین دؤنوش یولوندا قوروما‌لیغینی تورکمن‌لر ائدر، طرابلوسا قدر مشایعت ائدرلر. بو ایلک تانیشما‌دان سونرا بیروتا تعیین اولونان یئنی ائلچینین عکار بؤلگه‌سین‌دکی ایکی تورکمن کندینه گئتمه‌سی گله‌نک حالینا گلیر. اوزون ایللر لبنان تورکمن‌لری‌نین یالنیز عکاردا یاشایان‌لاردان عبارت اولدوغو بیلینیردی. کواشره کندی‌نین یؤنلندیرمه‌سی ایله بعلبک بؤلگه‌سین‌دکی تورکمن‌لرله 2007، ضنیه بؤلگه‌سین‌دکی تورکمن‌لر ایله 2011.جی ایلده ایلک ارتباط قورولدو.

بو گون لبناندا تورک وارلیغینی و عثمانلی میراثینی سککیز باش‌لیق آلتیندا اینجه‌له‌یه‌بیلریک: عکار تورکمن‌لری، بعلبک تورکمن‌لری، ضنیه تورکمن‌لری، گریت تورک‌لری، لبناندا یاشایان تورکیه جمهوریتی وطنداش‌لاری، آنادولو منشأ‌لی عائله‌لر، سوریه تورکمن‌لری و چرکزلر.

عکار، لبنانین قوزئی ویلایتی ایچینده یئر آلیر. عکاردا کواشره و عیدمون آدلی ایکی تورکمن کندی وار. کواشره، تورکجه‌نی قوروموش اولماسی و تورکیه ایله ایلک علاقه قوران کند اولماسی سببین ایله اؤن پلاندا. اها‌لی‌سی 3000 نفردیر و هامیسی تورکمن. 5000 جمعیت‌لی عیدموندا 3500 نفره یاخین تورکمن یاشاییر. یاخینلیغین‌داکی 5000 جمعیت‌لی مشتی حسن ده تخمینا 350 تورکمن؛ 1200 جمعیت‌لی الدبابیه‌ده 50 تورکمن یاشاییر. 2500 جمعیت‌لی الداوسی کندینده بیر نئچه تورکمن عائله و 50یه یاخین تورکمن یاشاییر. عکاردا یاشایان تورکمن ساییسی 7000دن چوخ.

بعلبک تورکمن‌لری ایله تورکیه‌نین تانیشماسی عکار تورکمن‌لری‌نین تورک مقام‌لاری بعلبک تورکمن کندلرینه یؤنلتمه‌سی ایله 2007ده باش وئردی. بو بؤلگه‌دکی تورکمن‌لر بئش تورکمن کندی و هرمل یاخینلیغین‌داکی بیر کندده اوتورور. دورس‌ده 700، شیمیه‌ده 1200، نعنیه‌ده 900، حدیدیه‌ده 600، مشاریع القاع‌دا 500 نفر اولماق اوزره بعلبکده 4000 نفره یاخین تورکمن یاشاییر.

ضنیه‌ده یاشایان تورکمن‌لر ایله تورکیه‌نین ارتباطی بعلبک تورکمنلریندن ده سونرا 2011ده قورولدو. او واختا قدر نه تورکیه‌نین، نه ده دیگر تورکمن بؤلگه‌لرینین ضنیه تورکمن‌لری حاقیندا بیر معلوماتی یوخ ایدی. ضنیه‌ده؛ حواره‌ده 600، جیرون‌دا ایسه 100 نفره یاخین تورکمن یاشاییر.

گونوموزده 10 مینه یاخین گریتلی تورکون لبناندا یاشادیغی تخمین ائدیلیر. بون‌دان باشقا، بیروتدا اقتصادی سبب‌لرله بورایا کؤچ ائتمیش 50 مینه یاخین تورک وطنداشی یاشاییر.

طرابلوس و عکاردا شهرین اؤنده گلن عائله‌لری کیمی تانینان؛ عثمانلی دؤورون‌دن قالان بؤیوک عائله‌لر وار. طرابلوسدا یالنیز تورکمانی سوی آدینی داشییان بیر بیریله قوهوم 200 عائله وار. تورکمانی عائله‌سی عضو‌لری‌نین یاراتدیغی "لبنان تورکمانی جمعیتی" ده فعالیت‌لرینی داوام ائتدیریر. عثمانلی-روس مساواشی (1877-78) سونراسی اورتادوغویا یئرلشدیریلن چرکزلر ده تورکیه ایله باغلارینی داوام ائتدیریر.

سوریه‌ده‌کی ایچ ساواش سببی ایله لبنانا دا اؤنم‌لی ساییدا سوریه‌لی تورکمن کؤچ ائتدی. حلب و لاذقیه‌ده یاشایان تورکمن‌لر ان یاخین اؤلکه اولان تورکیه‌یه کؤچدو. حمص و طرطوس‌دا یاشایان تورکمن‌لر ده جغرافی اولا‌راق ان یاخیندا یئرلشن و قوهوملوق ایلیشکی‌سی ایچینده اولدوق‌لاری عکار و بعلبکده‌کی تورکمن بؤلگه‌لرینه اوستونلوک وئردی. مین‌لرجه تورکمن عکار بؤلگه‌سینه کؤچرکن بعضی تورکمن قروپ‌لاری دا بعلبکه کؤچدو. دمشقده یاشایان تورکمن‌لردن ده جدی ساییلابیله‌جک نیسبت‌لرده اینسانین بیروت و طرابلوسا کؤچ ائتدیگی بیلینیر.

لبنان تورکمن‌لرینه باخیش قونوسوندا دؤنوم نقطه‌سی رجب طیب اردوغانین 2010دا لبنان سفرینده کواشره‌نین یاخینلیغیندا حیاتا گئچیردیگی میتینگ اولدو. تورکیه‌نین تورکمن‌لرین آرخاسیندا اولدوغو گؤرونتوسو وئرمه‌سی ده تورکمن‌لرین قونوم‌لارینی، ایمیج‌لرینی مثبت ایستیقامتده ائتکیله‌دی. 2013ده بیروتدا آچیلان یونوس امره تورک مدنیت مرکزی و 2014ده آچیلان تیکا(تورکیه ایشبیرلیگی و کووردیناسیون آژانسی) دا تورکمن‌لره قارشی ماراق و یاردیم‌لارین آرتماسی باخیمین‌دان اؤنملی رول اوینادی. تورکمن‌لرین وضعیتینده یاخشیلاشما‌لار اولسا دا لبناندا هله ده هر هانسی بیر سیاسی نماینده‌لری و یا گوج‌لو مدنی قوروملاری یوخ. اؤنوموزده‌کی سوره‌جده بو یؤنده ده ایشلر گؤرولمه‌لی‌دیر.



ایلگیلی‌لی خبرلر