چرشنبه سویو - ابراهیم ساوالان

چرشنبه سویو ائله همن سویون مقدس‌لیگیندن قایناقلانیر

چرشنبه سویو - ابراهیم ساوالان


بیزیم بورالاردا، خالق ایلین آخیر چرشنبه‌سینده سحر تزدن آییلیب، یاخیندا اولان چایا، آرخا، بولاغا گئدیب سویون اوستوندن آتیلیرلار. اونلارا گؤره، بو ایشله کؤهنه ایلدن قالان نوخوشلوقلار ساغالیب تزه ایله ساغلام بدنله آیاق قویاجاقلار. هله بعضیلری ساغلام قالما اینانجی ایله چرشنبه گونو یویونارلار.
اردبیلده بالیقلی چایین اطرافی ایزدحام اولور. اوردا سوپورگه‌لری سویا باسیب بیربیرینه سو چیله‌ییرلر. تبریزده اوشاقلاری یوخودان آییلدیب یوخولو-یوخولو ماشینا سوخوب چای کنارا گئدیرلر. ماشیندان یئنمه‌سه‌لر ده، ائله ماشین ایچینده نئچه دفه کؤرپو اوستوندن کئچیب، اونو سودان آتیلماق کیمی دیرلندیریرلر. قدیملرهمه‌شه قاپیمیزدان سو آخاردی. قاپیدان سودان آتیلیب ائوه تپیلردیک. ایندی آخارسولاریمیز قورویوب، آنام پیلله‌کن‌ده بیر تئشته سو تؤکور و من حالسیز-حالسیز اونون اوستوندن کئچیرم و حالسیزلیغیم ائله اوردا قالیر.
بو میفیک اینامین اؤز کؤکو واردیر. سو قدیم تورکلرده مقدس ساییلمیشدیر. قوشا بولاغین سویو کوراوغلویا گورسس و گوج وئریر، اونو آشیق ائدیر. بویلو قادین چتین دوغارکن، دوغوم زامانی قادین اؤزونو پیس حیس ائدرکن بیری گئدیب چایین سویونو قیلینج‌لاییب دئیرمیش کی: آل‌آروادی بویلونون جییه‌رینی یئرینه قوی.
بو دب "کؤچ" رومانیندا اینانیلماز درجه گؤزل بیچیمده اؤز عکسینی تاپمیشدیر.
چرشنبه سویو ائله همن سویون مقدس‌لیگیندن قایناقلانیر. چرشنبه گونو قابلاردا قالان کؤهنه ایلین سویونو داغیدیب و اونلاری چرشنبه سویو ایله دولدورارلار. بعضی یئرلرده باشماقلارینی سو آپارسین دئیه چایا آتارلار. باشماق تورک فولکولوروندا دارلیقدیر. باشماغی سویا آتارسانسا اورگیندن دارلیق کؤچر، یئرینه آیدینلیق چؤکر.



ایلگیلی‌لی خبرلر