ابن سینانین قانون کتابی مزایدهیه قویولاجاق
"اسلام دونیاسینین صنعتلری" آدلی مزایدهده اورتادوغو و هیندیستان مدنیتلرینه عاید چوخ ساییدا اثر ساتیشا سونولاجاق
اینگیلترهنین باشکندی لندنده، مشهور آچیق آرتیرمالارا ائو صاحبلیگی ائدن ساتبیز مزایده ائوینده عثمانلی دؤورونه عاید گؤزل اثرلر ساتیشا قویولاجاق.
ساتبیز حراج ائوینین هر ایل گئچیردیگی "اورتادوغو و هیندیستاندا اینجهصنعت" هفتهسی چرچیوهسینده 25 اکتبردا باش توتاجاق "اسلام دونیاسینین صنعتلری" آدلی مزایدهده اورتادوغو و هیندیستان مدنیتلرینه عاید چوخ ساییدا اثر ساتیشا سونولاجاق.
مزایدهده ابن سینانین مین ایللیک "القانون فی الطب" آدلی هیجری 538/ میلادی 1144.جو ایل تاریخلی کیتابینین خستهلیکلرله باغلی اولان اوچونجو جیلدی ده آچیق آرتیرمایا قویولاجاق.
اصل نسخهسی 1025.جی ایلده تاماملانان اثرین، یازیلدیغی دؤوره یاخین تاریخلره دایانان الیازما نومونهلری چوخ نادیر اولدوغو اوچون سؤزوگئدن اثر، مزایدهنین ان دگرلی پارچالاریندان بیری اولاراق تانیملانیر.
کیتاب حاقیندا معلومات وئرن ساتبیز اورتادوغو بؤلومونون مزایده باشقانی بندیک کارتر،
"سون زامانلاردا طب ایله باغلی اثرلر چوخ گؤزده. موزهلردن و اؤزل کلکسیونچولاردان اورتا چاغ اسلام دونیاسینا عاید طب، بیلیم و آسترولوژی ساحهسینده کیتابلارا چوخ طلب وار. مثلا، باشقا بیر طب عالیمی مجوسینین بیر اثرینی 480 مین استرلینگه ساتمیشدیق" دئدی.
ابن سینانین تخمینا یئددی یوز ایل اورتا دوغو و آوروپادا اوخودولان بو کیتابی اوچون تخمین ائدیلن قیمت ایسه 80 مین ایله 120 مین استرلینگ آراسیندا.
آنجاق کارتر، القانون فی الطبین کپیسینین 1990لاردا 300 مین استرلینگه ساتیلدیغینا دقت چکهرک، بو کیمی اثرلرین نه قدره ساتیلاجاغینی تخمین ائتمهنین چتین اولدوغونو ایفاده ائتدی.
ساتیلاجاق اثرلر آراسیندا بو ایلین ان گؤزده پارچالاریندن بیری ده 16.جی یوزایل عثمانلی دؤورونه عاید دمیر ایپلیک یاله ایشلنمیش (چاتما) ایپکلی مخمر خالی.
مزایدهده ساتیلاجاق پارچالار حاقیندا معلومات وئرن ساتبیز اسلامی صنعتلر متخصصلریندن آلکساندرا روی، خالچانین ایستانبول و بورسادا توخوندوغونو تخمین ائتدیکلرینی بیلدیردی.
بنزرسیز خالچانین 80 مین ایله 120 مین استرلینگه ساتیلماسی گؤزلنیلیر.