گوندم آنالیز: 43

کرال عائله‌سی و خاشقجی جینایتی

گوندم آنالیز: 43

اکتبرین 2-ده ائولی‌لیک سندلریله علاقه‌دار سعودیه عربیستانی‌نین ایستانبول‌داکی کونسول‌لوغونا گئدن واشینگتن پست قزئتی‌نین موخبیری جمال خاشقجی‌نین اورا‌دان چیخمادیغینی بیلینجه نیشان‌لی‌سی خدیجه چینگیز تورکیه-‌نین رسمی نماینده‌لرینی معلوماتلاندیردی و اونو تاپماق اوچون عملیاتا باشلانیلدی.

دونیا مطبوعاتی‌نین دا یاخین‌دان تعقیب ائتدیگی خاشقجی حادثه‌سینده تورکیه رسمی‌لری‌نین یئنی دلیل‌لری بیر-بیر مئدیایا چیخارماسی سعودیه طرفینی بیانات‌لارینی دییشمک مجبوریتینده قویدو.

لاپ باش‌دان جمال خاشقجی‌نین کونسوللوق‌دان چیخدیغینی ادعا ائدن سعودیه طرفی کامئرا گؤرونتولری‌نین اولمادیغینی بیل‌دیره‌رک توپلوم ایله هئچ بیر شئی بؤلوشمه‌دی. ایستانبولا گلن 15 نفرلیک اؤلوم تیمینی توریست دئیه مودافعه ائدن کونسوللوق داها سونرا بو ایشین جینایت اولدوغونو قبول ائده‌رک بو 15 آدامی و دیگر 3 کونسوللوق ایشچی‌سینی توتدو.

تورکیه پرزیدنتی رجب طیب اردوغانین سعودیه عربیستانی کرا‌لی سلمان ایله تلفون دانیشیغیندان سونرا عرب طرفی خاشقجی‌نین "کونسوللوقدا چیخان داوادا یانلیشیقلا اؤلدورولدوگونو بیلدیرسه ده، تورکیه رسمی‌لری توپلوم ایله  بؤلوشدوگو خاشقجی‌نین گؤرونتولری و دیگر دلیل‌لر اساسیندا بو جینایتین تصادفی دئییل، پلان‌لی بیر سوء-قصد اولدوغونو بیلدیردی.

سعودیه عربیستانی ایلک باشدا جینایتی اینکار ائتدی. خدیجه چینگیزین کونسوللوغون قارشی‌سیندا نیشان‌لی‌سینی بیر مودت گؤزلمه‌سی، تهلوکه‌سیزلیک رسمی‌لرینی خبردار ائتمه‌سی و سونرا بوتون کشفیاتین حرکاتا کئچمه‌سی جینایته دایر واجیب دلیل‌لری اورتایا چیخارماقلا پروسه سی باشقا یؤنه گتیردی. سعودیه طرفی اوزون مودت اینکار ائتدی، لاکین تورکیه-‌نین پروسئسی دوزگون ایداره ائتمه‌سی و بونو دونیا مئدیاسی ایله پایلاشماسیندان دوغان تضییقله عربیستانین موضعی دییشمه‌یه باشلادی: رد ائتدیک‌لری حادثه‌یه آلترناتیو سناریولار قوشا‌راق وضعیت‌دن چیخماغا چالیشدی‌لار. آنجاق ایندی ده اورتایا قویدوق‌لاری بیانات نه تورکیه، نه ده دونیا ایجتیماعیتی طرفین‌دن قبول ائدیلمیر.

تورکیه پرزیدنتی رجب طیب اردوغان چیخیشیندا آشکارا چیخاریلان فاکت‌لاری و بو جینایتین اولجه‌دن پلانلاشدیریلدیغینی سؤیله‌دی.

حادثه‌دن اول ایستانبول‌داکی سعودیه کونسول‌لوغو نماینده‌لری‌نین پایتاخت ریاض-دا گئتدیگی، اورادا پلان قورولدوغو، 15 نفرلیک قاتیل تیمین توریست آدییلا تورکیه‌-یه گلدیگی، یالووا و بلگراد مئشه‌لرینده تفتیش آپاردیغی، طیب متخصصی‌نین بئله بو تیمده اولدوغونا دایر بیر چوخ مهوم دلیل‌لری میدانا تورکیه چیخاردی. فاکت‌لار و سعودیه عربیستانی‌نین سؤیله دیک‌لری بیر-بیریله ضدیت تشکیل ائدیر.

سعودیه عربیستانینا تضییق آرتدیقجا رهبرلیگی مانورلر ائدیر. بورادا ان اساس مسئله محمد بن سلمانی پروسئس و مسئولیت‌دن کناردا ساخلاماق‌دیر. تورکیه ده بونو گؤردوگو اوچون پرزیدنت رجب طیب اردوغان چیخیشیندا کرال سلمان ایله اوغلو محمدی آییردی و کرال سلمانا محمدسیز بیر چیخیش یولو تکلیف ائتدی.

بیلدیگیمیز کیمی، شاه‌زاده محمد بن سلمان جمال خاشقجینی شخصی هدفی حالینا گتیرمیش، اوندان ال چکمیردی. بوندان اول ده خاشقجینی سوس‌دورماق اوچون جهدلر اولموشدو. سعودیه عربیستانی کشفیات ایداره‌سی‌نین رئیس معاوینی احمد اسیری جمال خاشقجی ایله گؤروشونده اونو اؤلکه‌سینه قایتارماغا چالیشمیشدی.

تورکیه-‌نین پروسئسی ایستراتژی بیر شکیلده ایداره ائتمه‌سی نتیجه‌سینده سعودیه عربیستانینا قارشی اولوسلار آراسی تضییق یاراندی. امریکا-دا آغ ائو، خصوصاً ولیهد شاه‌زاده محمد بن سلمانی حادثه‌دن کناردا ساخلاماغا چالیشدا دا، امریکا سناسی نین موضعی و تورکیه-‌نین الینده کی هله مطبوعاتا آچیقلانمامیش دلیل‌لر محمد بن سلمانا موناسیبتی گئتدیکجه دارال‌دیر. امریکا پرزیدنتی دونالد ترامپ کرال سلمانین گوناه‌سیز اولدوغونا دایر فیکیرلر سؤیله‌سه ده، اونون اوغلونو مودافعه ائتمک‌دن گئری چکیلدی و "اورا‌داکی حاضیرکی وضعیتی شاه‌زاده ایداره ائدیر. اگر بیری گئتمه‌لی‌دیرسه، او دا اودور"، دئدی.

نوبتی وضعیت ده تورکیه یئنی ثبوت‌لاری، الینده اولان، اما هله ایجتیماعیت ایله بؤلوشمه‌دیگی دلیل‌لری مطبوعاتا چیخارسا، یقین کی، سعودیه عربیستانی‌نین ولیهد شاه‌زاده‌سی‌نین وضعیتی داها آغیر اولار. اونسوز دا محمد بن سلمان کرال آتاسی، خاریجدن آلدیغی دستک‌لری و هاوادارلارینی ایتیرمک عذره‌دیر.

تورکیه‌نین گوندمینه دایر تحلیل پروقرامی‌نین نوبتی بؤلومونده سیاست، ایقتیصادیات و جمعیت آراشدیرما‌لاری فوندونون امکداشی جان آجونون " کرال عائله‌سی و خاشقجی جینایتی " باش‌لیق‌لی آنالیتیک یازی‌سینی تقدیم ائتدیک.



ایلگیلی‌لی خبرلر