گوندم آنالیز: 33

هدف‌دکی اؤلکه ایران‌دیر

گوندم آنالیز: 33

امریکا ایرانین نوکلئر سلاح پروقرامینا گؤره احمدی نژاد دؤورونده تطبیق ائتدیگی تحریم ایران ایقتیصادیاتینا جدی زیان ووردو. 2013-جو ایلده پرزیدنت سئچیلن و مولاییم-اصلاحاتچی کیمی قبول ائدیلن حسن روحانی بو چرچیوه‌ده ایران خالقی اوچون بؤیوک اومید وعد ائدیردی. روحانی دؤورونده P5+1  اؤلکه‌لریله کئچیریلن موذاکیره‌لر نتیجه‌سینده ایرانین نوکلئر پروقرامینی محدود ائتمه‌سی و نظارت اوچون آچماسی قارشی‌سیندا ایرانا تطبیق ائدیلن تحریم لرین  یونگوللشدیریلمه‌سی قرارا آلیندی   بمت-ده ایمضا‌لانان نوکلئر راضیلاشما ایران خالقی و ایران ایقتیصادیاتی اوچون جدی اومید منبعی اولدو. بو وضعیت ایران ایقتیصادیاتیندا قیسا مودت‌لی بیر سیچراییش اولسا دا دونالد ترامپین امریکا پرزیدنتی سئچیلمه‌سیندن سونرا ایران ایله یئنی‌دن سرت موباحیثه لر آپاریلماغا باشلاندی. امریکا بو ایلین می آیی‌نین 8-ده تک طرف‌لی اولا‌راق بو راضیلاشما‌دان چیخدیغینی اعلان ائتدی.

امریکانین ایران ایله ایمضا‌لانان نوکلئر راضیلاشما‌دان چیخاجاغینی آچیقلاماسی قارشی‌سیندا ایران ایقتیصادیاتی بو وضعیتدن منفی تأثیرلندی. ایران دؤولتی دو‌لار مزننه‌سینی رسمی اولا‌راق 42 مین ریال اولا‌راق ثابتله‌سه ده سربست بازاردا امریکا دو‌لاری‌نین قیمتینده آرتیم اولدو. ریالین قیمتی ژانویه آییندان خاریجی پول قارشی‌سیندا آزالماغا باشلادی. حاضردا ایسه سربست مزننه‌ده بو، یوز اللی فایزه یوکسلدی. 2018-جی ایل ژانویه آییندا تقریباً 44 مین ریال اولان 1 امریکا دو‌لاری سون گون‌لرده 110 مین ریالا چیخدی.

امریکا ایرانا قارشی اولان تحریم لری یئنی‌دن تطبیقه باشلاما‌دان ایران ایقتیصادیاتی‌نین بو سویه‌ده چالخانتی‌لار یاشاماسی ایرانین تحریم لرین تطبیق ائدیلمه‌یه باشلانماسیندان سونراکی وضعیتینه آیدین‌لیق گتیریر. کؤرفز اؤلکه‌لری و ایسراییل ایرانین بؤلگه‌دکی سیاستیندن ناراحات اولدوق‌لارینی و امریکا ایله بیرلیکده ایرانین بو سیاستینی محدود ائتمک ایسته‌دیک‌لرینی گیزلتمیرلر. ایرانا تحریملر واسیطه‌سیله تضییق ائده‌رک، بؤلگه‌ده باشقا‌لاری واسیطه‌سیله چاتدیردیق‌لاری فوندلار و منبع‌لرین محدود ائدیلمه‌سی و بونونلا دا ایرانین محدود ائدیلمه‌سی هدف گؤتورولوب.

امریکانین ایرانا قارشی تطبیق ائتدیگی تحریم لرین مقصدی ایرانین دو‌لار، قیزیل و دیگر قیمت‌لی معدن‌لر ایله تیجارت آپارا بیلمه‌سی‌نین قارشی‌سی‌نین آلینماسی‌دیر. آیریجا تحریم لر چرچیوه‌سینده ایرانا اوچاق و اوچاق پارچالاری دا تحویل وئریلمه‌یه‌جک. تطبیق ائدیلن تحریملر ایران‌داکی اتومبیل سئکتورونو دا هدف گؤتوروب.

امریکانین تحریم تهدیدینه گؤره ایران-‌داکی یاتیریم لارینی دایان‌دیران شیرکت‌لر آراسیندا "دایملر بنز" ده وار. شیرکت ایران-‌داکی یاتیریم‌لارینی آرتیرماغی و ایراندا یوک ماشینی اوره تمگی پلانلاشدیرارکن، امریکا پرزیدنتی ترامپین ایرانا تحریم تطبیق ائتمه پلان‌لاری شیرکتین ایرانلا علاقه‌لی پلان‌لارینی دییشمه‌سینه سبب اولدو.

ترامپ تویتر صحیفه‌سینده تحریملره باخمایا‌راق ایران ایله تیجارت علاقه‌لرینی داوام ائتدیرن شیرکت‌لرین امریکادا بو ایشی گؤره بیلمه‌یه‌جک‌لرینی ایفاده ائتمیشدی. لاکین ترامپین سرت آچیقلاماسینا رغمن آوروپا بیرلیگی اؤلکه ‌لری تحریم لرین علیهینه اولدوق‌لارینی آچیقلادی‌لار. مثال اوچون آلمانیا خاریجی ایشلر ناظثری هایکو ماس‌ین وئردیگی آچیقلامادا ایراندا فعالیت گؤسترن آوروپا‌لی شیرکت‌لره دستکینی دیله گتیردی. ایران ایله تیجارتده پول کؤچورمه‌نین مومکون اولا بیلمه‌سینه ایمکان یاراتماغا جهد ائتدیک‌لرینی ایفاده ائدن ماس امریکانین ایرانا قارشی تطبیق ائتدیگی تحریم لری اوزونتو ایله قارشیلادیق‌لارینی سؤیله‌دی. ناظیر همچنین ایران ایله تیجارت علاقه‌لری‌نین قازانج مقصدلی اولمادیغینی و ایران‌داکی اینسان‌لاری دوشوندوک‌لرینی سؤیله‌سه ده، آوروپا بیرلیگی نین ایران ایله تیجارت‌دن بؤیوک قازانج الده ائتمگی پلانلاشدیردیغی و ایران‌دان نفت و گاز ساتین آلینماسی ایله روسیایا اولان آسیلی ‌لیغی آزالتماق ایسته‌دیگی معلوم‌دور. امریکانین دیگر آوروپا اؤلکه‌لرینی گؤزدن یایین‌دیرا‌راق ایران ایله ایمضا‌لانان نوکلئر موقاویله‌دن چیخماسی آوروپا بیرلیگی و امریکا آراسیندا اؤنملی ضدیت‌لره آپاریب چیخارا بیلر.

تورکیه‌نین سیاست، ایقتیصادیات و جمعیت آراشدیرما‌لاری فوندو-ستا-نین آراشدیرماچی-یازاری جان آجونون "هدف‌دکی اؤلکه ایران‌دیر" باش‌لیق‌لی آنالیتیک یازی‌سینی تقدیم ائتدیک.

 



ایلگیلی‌لی خبرلر