“آوروپا اردوسو”نون یارادیلماسی اوچون ایلک آددیم آتیلدی

آلمانیا باش ناظیری آنگلا مرکل آلمانیا-فرانسا امکداش‌لیغی و اینتگراسیون موقاویله‌سی ایله آوروپا اردوسو اوچون ایلک آددیمی آتدیق‌لارینی آچیقلادی.

آلمانیا باش ناظیری آنگلا مرکل و فرانسا پرزیدنتی امانوئل ماکرون آلمانیانین آخن شهرینده کئچیریلن مراسیمده "آخن موقاویله‌سی" اولا‌راق سجیه‌لندیریلن و آلمانیا-فرانسا امکداش‌لیغی و اینتگراسیون موقاویله‌سی آدینی داشییان متنه ایمضا آتدی‌لار.

مرکل سؤزوگئدن موقاویله‌نین آوروپا اردوسو یولوندا ایلک آددیم‌لار اولدوغونو بیلدیردی.

قئید ائتمک لازیم‌دیر کی، ماکرونون گوندمه گتیردیگی بیرگه اردو فیکری آوروپا بیرلیگی اؤلکه‌لرینی ایکییه بؤلموشدو.

ماکرونا ایلک دستک آلمانیا باش ناظیری آنگلا مرکل‌دن گلمیشدیدی.

مرکل: "بیر گون حقیقی آوروپا اردوسونون یارادیلماسی ویزیونو اوزرینده ایشلملیگیک" دئیه بیلدیرمیشدی.

ایسپانیا، ایتالیا، چکیا و ماجاریستان کیمی اؤلکه‌لر ده بیرگه اردو فیکرینه مثبت باخدیق‌لارینی آچیقلامیشدی‌لار.

اینگیلتره باشدا اولماقلا، اطریش، سوئد و روسیا ایله سرحد اولان لتونیا و لیتوانی کیمی اؤلکه‌لر ایسه ناتونون مودافعه گوونجه سینه اوستونلوک وئردیک‌لرینی بیلدیرمیشدی‌لر.

فیکره قارشی چیخان اؤلکه‌لره سون اولا‌راق هلند و دانیمارکا قوشولموشدو.

امریکانین پرزیدنتی دونالد ترامپ دا ماکرونون اورتایا آتدیغی فیکیره چوخ سرت رئاکسیا گؤستره‌رک: "امانوئل ماکرون آوروپانین امریکا، چین و روسیا‌دان قورونماق اوچون اؤز اردوسونو قورماسینی تکلیف ائدیر. لاکین  بیرینجی و ایکینجی دونیا ساواش لاریندا آلمانیا واردی. بس بو، فرانسا اوچون نئجه اولموشدو؟ امریکا اردوسو گلیب چاتمازدان اول پاریس-ده آلمان دیلینی اؤیرنمه‌یه باشلامیشدی‌لار" دئمیشدی.

آوروپا اردوسو آچیقلامالاریندان‌ سونرا تورکیه-‌دن ایلک آچیقلاما عدالت و اینکیشاف پارتیسی‌نین سؤزچوسو عمر چلیک وئرمیشدی.

چلیک: "بو چوخ بؤیوک بیر فیکیر آیری‌لیغی‌دیر. بئش ایل، اوچ ایل اول دوشونوله بیله‌جک بیر شئی دئییل. آچیق بیر شکیلده ترانس آتلانتیک بیرلیگه بیر چاتلاما اورتایا چیخدیغینی گؤستریر " دئمیشدی.