ناتو، آمریکانین سوریه‌دن چکیلمه‌سینی دگرلندیردی

ناتونون، آمریکا بیرلشمیش دؤولتلرینین سوریه‌دن چکیلمه و داعشین تورپاق، مالیه و دستک الده ائتمه‌سینه قارشی متفیقلرله چالیشمایا داوام ائتمه قرارینی دقته آلدیغی آچیقلاندی.

ناتودان بیر یئتکی‌لی، اتفاقین سوریه‌ده وارلیغینین اولمادیغینی آنجاق داعشله مباریزه‌یه ارکن اویاری و گؤزلم اوچاقلاری (AWACS) و عراق‌داکی تعلیم گؤره‌و‌لری ایله قاتقی وئردیگینی قید ائتدی.

ناتو یئتکیلی‌سی،

"آمریکانین سوریه‌دن چکیلمه و داعشین تورپاق، مالیه و دستک الده ائتمه‌سینه قارشی متفیقلرله ایشله‌مه‌یه داوام ائدجگی یولونداکی قرارینی دقته آلدیق. آمریکانین داعش قارشیدی اولوسلارآراسی کوالیسیونا باغلیلیغینی ممنونلوقلا قارشیلاییریق" ایفاده‌سینی ایستیفاده ائتدی.

داعشین "گئری قاییتماسینین" انگلله‌نمه‌سینین بیر ضرورت اولدوغونا ایشاره ائد‌ن یئتکی‌لی، متفیقلرین ترور هؤرگوتو ایله مباریزه‌یه دایر دایما مشاوره‌لر حالین‌دا اولدوغونو بیلدیردی.

ناتو یئتکیلیسی، باش کاتیب ینس استولتنبرگین آمریکانین سوریه‌ده‌کی مؤوجودلوغو ایله باغلی اؤنجه‌کی گون آمریکا خاریجی ایشلر باخانی مایک پومپئو ایله گؤروشدوگو معلوماتینی پایلاشدی.

آمریکا پرزیدنتی دونالد ترامپ، سوسیال پایلاشیم سایتی تویتر حسابین‌دان اؤنجه‌کی گون وئردیگی آچیقلامادا،

"باشقانلیغیم دؤورون‌ده سوریه‌ده اولماغیمیزین تک سببی اولان داعشی مغلوب ائتدیک" ایفاده‌سینی ایشلتمیشدی.

آغ ائو سؤزچوسو سارا سندرز ده وئردیگی آچیقلامادا، "داعش ایله مباریزه‌نین یئنی مرحله‌سینه گیرمکله برابر، آمریکا عسگرلرینی اؤلکه‌یه گئری چکمه‌یه باشلادیق" معلوماتینی وئرمیشدی.

آمریکا مئدیاسینین دیش ایشلری مقاملارینا دایاندیردیغی خبرلرده ایسه خاریجی ایشلر باخانلیغینین سوریه‌ده‌کی بوتون پرسنلینی ۲۴ ساعات ایچین‌ده چکه‌جگی، آمریکانین سوریه‌ده‌کی عسگرلرینین ده ۶۰ ایله ۱۰۰ گون ایچین‌ده اؤلکه‌دن چکیله‌جگی ادعا ائدیلمیشدی.