دانمارک، تهران ائلچیسینی گئری چاغیردی
"چوخ جدی بیر وضعیت. حادثه‌نین جدیلیگینی ایضاح ائتمک اوچون سؤز تاپماق چتین‌دیر"
دانمارک خاریجی ایشلر باخانی آندرس ساموئلسن، دانمارکین تهران ائلچیسینی گئری چاغیردیقلارینی بیلدیردی.
باخان ساموئلسن، مطبوعات کنفرانسین‌دا ایران استخباراتینین، دانمارکدا سوءقصد گیریشیمی پلانلاماسین‌دان اؤترو، دانمارکین تهران‌داکی ائلچیسینی گئری چاغیردیغینی دئدی.
ایرانین دانمارکدا سوءقصد پلانلاماسینین قبول ائدیلمز اولدوغونو دئیه‌ن ساموئلسن، "چوخ جدی بیر وضعیت. حادثه‌نین جدیلیگینی ایضاح ائتمک اوچون سؤز تاپماق چتین‌دیر. تهران‌داکی ائلچییمیزی مصلحتلشمه‌لر اوچون گئری چاغیردیق" دئدی.
ساموئلسن، اینگیلتره باشباخانی ترزا می و آمریکا خاریجی ایشلر باخانی مایک پومپئونون دانمارکا دستک وئره‌ن آچیقلامالارینی خاطیرلاداراق، آوروپا بیرلیگی نزدین‌ده ده دانمارکین ایرانا تحریملر تطبیق ائتمه‌سی اوچون آراییش ایچین‌ده اولاجاقلارینی آچیقلادی.
ایرانین دونن دانمارک خاریجی ایشلر باخانلیغینا چاغریلان کپنهاگ ائلچیسین‌دن ایسه ایضاحات طلب اولوندو.
دانمارک پلیس استخبارات قورومو وئردیگی آچیقلامادا، ایران استخباراتینین، دانمارکداکی اهوازین قورتولوشو اوچون عرب مباریزه‌سی حرکتی عضولرینه سوءقصد پلانلاشدیردیغینی و بو چرچیوه‌ده آپاریلان عملیات‌دا، ایران اصیل‌لی نروژ وطنداشی بیر نفرین ۲۱ اکتبردا، سوئدین گوتبورگ شهرین‌ده توتوقلاندیغینی بیلدیردی.
ایران، ترور هؤرگوتو اولاراق گؤردویو اهوازین قورتولوشو اوچون عرب مباریزه‌سی حرکتینین دانمارک لیدئرینی اؤلدورمه‌یه چالیشماقلا سوچلانیر.
دانمارکدا ۲۸ سپتامبر ۲۰۱۸ تاریخین‌ده ائدیلن عملیات‌دا، "بعضی شخصلری اؤلدورمه‌یه چالیشدیغی" ادعا ائدیله‌ن ایران استخباراتینا منسوب بیر نفرین یاخالاندیغی آچیقلانمیشدی.
اهواز شهرین‌ده، ۲۵ نفرین حیاتینی ایتیردیگی سالدیرینین مسئولیتینی اهوازین قورتولوشو اوچون عرب مباریزه‌سی حرکتینین بیر قولو اولان اهواز میلی مقاومتی آدلی هؤرگوت اوزرینه گؤتورموشدو.
اهوازین قورتولوشو اوچون عرب مباریزه‌سی حرکتینین قوروجوسو احمد ملا نیسی ده ۸ نوامبر ۲۰۱۷ تاریخین‌ده هلندین لاهه شهرین‌ده ائوینین قارشی‌سین‌دا سلاحلا وورولاراق اؤلدورولموشدو.
