ترامپ پاریس-ده امانوئل ماکرون ایله گؤروشدو

الیزه ساراییندا گؤروشن ایکی لیدئر بیرگه مطبوعات کونفرانسی کئچیردی‌لر.

ترامپ پاریس-ده امانوئل ماکرون ایله گؤروشدو

آمریکا پرزیدنتی دونالد ترامپ فرانسا اینقیلابی‌نین ایلدؤنومو مراسیم‌لرینده ایشتیراک ائتمک اوچون پاریسه گئتدی و پرزیدنت امانوئل ماکرون ایله بیر آرایا گلدی.

الیزه ساراییندا گؤروشن ایکی لیدئر بیرگه مطبوعات کونفرانسی کئچیردی‌لر.

فرانسا پرزیدنتی: "گؤروشده تیجاری علاقه‌لر، ترورلا موباریزه و سوریه مسئله‌سی ایله باغلی عینی فیکیرده اولدوغوموزو تصدیق ائتدیک. لیبی و افریقانین ساحل بؤلگه‌سی ایله باغلی و بیر سیرا مسئله‌ده ده عینی گؤروشه مالیکیک. گلوبال ایسینمه مسئله‌سی داخیل اولماقلا، چوخ آز مسئله ایله علاقه‌دار فیکیر آیری‌لیق‌لاری مؤجوددور. من پاریس ایقلیم سازیشینه صادقم" دئدی.

ماکرون اؤلکه‌سی‌نین ترورلا موباریزه مسئله‌سینده ده آمریکا ایله عینی ایستیقامتده اولدوق‌لارینی ایفاده ائتدی.

دونالد ترامپ فرانسانین یئنی لیدئری‌نین لیبرال ایقتیصادیاتا باخیشینی تقدیر ائتدی، تیجارت و ایقتیصادیاتین اینکیشافی اوچون فرانسا لیدئری‌نین بوروکراتیک مانعه‌لری آرا‌دان قالدیرما جهدلرینه بؤیوک حؤرمت بسلدیگینی بیلدیردی.

ایکی طرف‌لی موناسیبت‌لره توخونان ترامپ: "فرانسا و آمریکا تاریخی چوخ اوزاغا گئدن ایکی متفیق‌دیر. بو ایکی اؤلکه ازل‌دن بری آزادلیق دیرلری ایله بیر-بیرینه باغلی‌دیر. ایکی اؤلکه آراسیندا باغ‌لار قیریلمایا‌جاق درجه‌ده گوج‌لودور. بیزیم علاقه‌لریمیز مکمل‌دیر" دئیه دانیشدی.

داها اول بو پاریس ایقلیم سازیشینی بیرطرف‌لی شکیلده لغو ائتمک ایستدیتینی سؤیله‌ین آمریکا باشقانی‌نین مطبوعات کونفرانسی زامانی ایشلتدیگی: "پاریس ایقلیم سازیشی ایله باغلی بیر شئی‌لر اولا بیلر. گؤزله‌ییب، نلر اولاجاغینی گؤرریک" ایفاده‌لری دقت چکدی.



ایلگیلی‌لی خبرلر