Ğaräp dönyasınnan Türkiyä häm Misırnıñ diplomatik mönäsäbätlären arttıruına xuplaw

Soğud Ğaräbstanı tışqı êşlär ministrlığınnan yasalğan yazmaça belderüdä töbäk illäreneñ häm xalıqlarınıñ faydasına bulğan bu diplomatik adımnıñ regional’ häm xalıqara däräcädä iminlekne häm tınıçlıqnı arttıracağı häm urtaq mänfäğätlärgä xezmät itäçäge iskärtelep uzıldı.

Berläşkän Ğaräp Ämirlekläre tışqı êşlär ministrlığınnan yasalğan belderüdä isä, ike il arasındağı kileşü turında maqtaw süzläre äytelep, bu möhim adımnıñ êlemtä häm dialog küperlären köçäytäçäge, töbäktä totrıqlılıqnıñ häm konstruktiv xezmättäşlekneñ nığıtılaçağına öleş kertäçäge bilgeläp uzıldı.

Belderüdä: "Misır-Türkiyä arasındağı mönäsäbätlär regional’ häm xalıqara däräcädä tınıçlıqnı häm üseşne köçäytäçäk, ike ilneñ häm xalıqlarınıñ urtaq mänfäğätlärenä xezmät itäçäk häm alar öçen tağın da kübräk mullıq häm üseş täêmin itäçäk”, - dip äytelde.

Ğaräp Ligası ğomum särqatibe Äxmäd Äbu Gayt ta bastırğan belderüendä Misır belän Türkiyä arasındağı mönäsäbätlärneñ yaxşıruı häm ike il arasında yañadan tulı wäqalätle ilçene bilgeläw qararınnan qanäğätlelegen citkerde.

Ğaräp parlamentı da yazmaça belderüendä Misır belän Türkiyäneñ diplomatik mönäsäbätlären tulı wäqalätle ilçe däräcäsenä kütärüen “uñay adım” bularaq bäyäläde.

Belderüdä bu adımnıñ Yaqın Könçığışta totrıqlılıqnıñ täêmin itelüenä häm töbäk illäre aldında torğan krizislarnıñ häm problemalarnıñ çişeleşenä möhim öleş kertäçägenä basım yasaldı.

Türkiyä häm Misır arasındağı diplomatik mönäsäbätlärneñ tulı wäqalätle ilçe däräcäsenä citkerelüe iğ’lan itelgän ide.

Türkiyä häm Misır tarafınnan yasalğan urtaq belderüdä Türkiyäneñ Qahirä ilçese bulıp Salih Mutlu Şänneñ, Misırnıñ isä Änkara ilçese bularaq Amr Älhamamyneñ namzät (kandidat) itep kürsätüe belderelgän ide.