Soçi näticäläre

Soçida Törkiyä, Rusiyä häm İran liderları qatnaşında uzğan öç’yaqlı sammitnıñ urtaq belderüe iğ’lan itelde. Bilgele bulğança, çara kiçä uzdı. Anda Törkiyä ilbaşı Räcäp Tayyip Ärdoğan, Rusiyä dawlät başlığı Vladimir Putin häm İran citäkçese Xasan Ruxani Süriyä mäs’äläsen urtağa salıp söyläşte.

Alarnıñ urtaq belderüendä “Liderlar Süriyädä separatist programmalarğa qarşı toruda qararlı buluların rasladı” diyelä. Öç ilbaşı älege däwlätneñ suverenlığı, bäysezlege, berlege häm cir bötenlege öçen nıq toraçaqların assızıqladı. Alar AQŞ xärbi köçläre Süriyädän çıqsa - ilneñ totrıqlılıq häm iminlege köçäyäçäk fikerendä.  

Liderlar İdlib kiyerenkelekne kimetü töbägendä “utnı tuqtatu”nı bozu oçraqların azaytu öçen tögäl adımnar yasaw mäs’äläsendä kileşte. Şulay uq, terrorçı oyışmalar belän köräştä xezmättäşlek däwam itäçäk. Oç ilbaşı da Süriyä mäs’äläsenä xärbi çişeleş turı kilmäwenä, krizisnıñ barı tik süriyälelärneñ citäkçelegendä, BMOnıñ iminlek şurası qararına turı kilüçe säyäsi proşess yulı belän betereläçägenä ışana.  

Garant illärneñ başlıqları Süriyädä Konstituśiyä komitetınıñ iñ yaqın çorda tözelüen teli.

Alar, şulay uq, rejim häm oppoziśiyä tarafınnan äsirlekkä alınuçılarnıñ ike yaqta da irekkä çığarıluları öçen qanäğat’.  

 Belderüdä Süriyägä yärdämne arttıru öçen BMO häm xäyriyä oyışmalarına, xalıqara cämäğat’çelekkä möräcät’ ittelär. Möhacirlär häm il ‘eçendä yäşägän urınnarın taşlap kitärgä mäcbür buluçılar Süriyädäge êlekkege cirlärenä qaytırğa teläsä, alarnıñ küçenüläre öçen kiräkle şartlarnı täêmin itü dä assızıqlandı.

Çirattağı öç’yaqlı sammitnı Törkiyädä ütkärergä qarar qıldılar.