Yıldırım Qıtayda

Törkiyä Böyek Millät Maclese räise älege il belän mönäsäbätlärne üsterü mäs'äläsendä êş alıp bara

Yıldırım Qıtayda

Törkiyä Böyek Millät Maclese räise Binali Yıldırım Qıtay belän mönäsäbätlärneñ yıldan-yılğa üsüe turında söyläde. Ul ilbaşı Räcäp Tayyip Ärdoğan belän Qıtay däwlät başlığı Si Śzin’pinnıñ (Си Цзиньпин) Argentinada oçraşıp möhim qararlarğa baruın belderde. Älege bäyläneşlärne däwam itep Yıldırım Qıtaynıñ Şên’si provinśiyäseneñ Şian şähärenä bardı. Anda ul töbäk parlamentı räise Xu Xipiñ belän oçraştı.

Binali Yıldırım Qıtay belän Törkiyäneñ Aziyäneñ könçığış häm könbatış oçında urın alğan ike möhim däwlät buluın, aralar yıraqlığına qaramastan ike ilneñ tirän tamırlı tarixqa iyä buluın belderde. “Tarixi Yefäk yulın yañadan tereltüne maqsat itep quyğan proyektlar belän älege marşrutqa qabat timer yul êlemtäse suzu öçen Qıtay-Törkiyä xezmättäşlegen däwam itärgä telibez,”-dide Binali Yıldırım.  Ul ikeyaqlı mönäsäbätlärne köçäytü qısalarında turizmnı da canlandıru ixtimalın assızıqladı. “Şian belän İstanbul arasında oçışlar başlanırğa mömkin. Törek hawa yulları anda säfär açarğa äzer,”-dide ul.  

Yıldırım kön däwaminda şähärdäge 13 ğasırlıq Şian Uluğ Camiğı, 22 ğasırlıq “Tufraq ğaskärlär” quyılğan muzeynı zıyarät itte, qalanıñ tarixi divarların qaradı.

Binali Yıldırımnıñ Qıtayğa säfäre düşämbe könne başlandı. Ul ilneñ Milli xalıq kongressı daimi komitetı räise Li Canşu häm kiçä xökümät räise Li Kêsyan belän dä oçraştı

 



Bäyläneşle xäbärlär