Çıñğız Äytmätov iskä alındı

Törkiyä üseştä dönya liderı

Törkiyä iqtisadı, yılnıñ öçençe çiregendä ike śifrlı üseş külämenä ireşep, Awrupa Berlege, G20 häm OECD illären uzdı. Awrupa Berlege illärennän dürt märtäbä kübräk üskän Törkiyä G20dä dä üseş sannarı belän iğtibarnı cälep itüçe Qıtaynı häm Hindistannı artta qaldırdı.

“Anadolu” agentlığı xäbärçeseneñ Törkiyä statistika oyışması, Awrupa statistika ofisı Eurostat häm OECD mäğlümatlärenä nigezlänep äzerlägän xäbärenä kürä, Törkiyä bıyıl ikençe çirektä ireşkän 5,2%lıq üseş citeşterüçänlegen öçençe çirektä (iyül’-sentyabr’ çorında) ike märtäbä artıp, 11,1%qa citte.

Törkiyä şuşı üseş küläme belän telgä alınğan çorda Awrupa Berlege, G20 häm OECD illäre arasında berençe urın aldı. 

Awrupa illäre yılnıñ ikençe çiregendä 2,1%, öçençe çiregendä isä 2,5%qa üste. Bu räweşle Törkiyä Awrupa urtaça üseş külämennän 4 tapqır kübräk üseşne tormışqa aşırdı.

Awrupada yılnıñ öçençe çiregendä iñ küp üseşkä ireşkän il Rumıniya buldı. Rumıniya telgä alınğan çorda 8,8% üseş uñışına ireşte.

“Qazaqstandağı törek firmalarınıñ sanın arttırunı maqsat itäbez”

TÜKİB Törkiyä-Qazaqstan êşmäkärläre berlegeneñ idarä şurası başlığı Fırat Dävälioğlu Qazaqstanda êşçänlek alıp baruçı törek şirkätläreneñ sanın häm ike il arasındağı kapital salunı arttırıp, urtaqlıq häm qardäşlek bağlanışların tağın da üsterüne maqsat itülären belderde.

Dävälioğlu “Anadolu” agentlığı xäbärçesenä yasağan açıqlawında, TÜKİBneñ 2016nçı yılnıñ 15nçe iyül’däge tüntäreleş omtılışınnan soñ tözelüen häm xäzerge waqıtta 49 äğzase buluın assızıqlap, Qazaqstanda êşläwçe törek êşmäkärläreneñ 90%ın wäkillek itülären äytte.

TÜKİBneñ tözelü maqsatınıñ Törkiyä belän Qazaqstan arasındağı säwdä êlemtälären köçäytü, Qazaqstanda êşläwçe törek êşmäkärlärenä yärdäm itü buluın assızıqlawçı Dävälioğlu firmalarğa xoquq mäs’älälärendä bulışlıq itü häm êş mömkinlekläre turında mäğlümat birü missiyasın üz östenä aluların belderde.

Tel häm mädäniyät yaqınlığı arqasında töreklärneñ Qazaqstanda êş başqarunıñ tağın da ciñelräk buluın añlatuçı Dävälioğlu: "Çönki biredä bezneñ qardäş ilebez. Êşmäkärlärebez biredä qız ala, qız birä, ğailä bağlanışların urnaştıra”, - dip äytte.

Qazaqstanğa kapital salırğa teläwçe törek êşmäkärläreneñ Astana ilçelegenä möräcäğät itüe kiräklegen, ilçelekneñ êşmäkärlärne TÜKİBka yünältüen äytüçe Dävälioğlu: "Biredä kapital salu uñaylıqları başqa il watandaşlarına qarağanda Törkiyä öçen tağın da yaxşıraq”, - dip basım yasadı.

Törkiyä belän Qazaqstan arasındağı säwdä küläme bıyıl berençe yartıyıllıqta 2016nçı yılnıñ şul uq çorına qarağanda 36,1%qa artıp, 925 million 100 meñ dollar buldı.

Qırğız yazuçısı Äytmätovnıñ 89 yıllığı

Dönyaküläm tanılğan qırğız yazuçısı Çıñğız Äytmätov 89 yıllığında Qırğızstan başqalası Bişkäktäge käbere yanında ğailäse häm yaratuçıları tarafınnan iskä alındı.

Äytmätovnın Ata Bäyit däwlät ziratındağı käberenä çäçäk bäylämnäre salındı, Qor’än uqıldı.

Yazuçınıñ ğailäse ülemennän soñ muzeyğa äyländergän öye dä kilüçelärgä açıldı.

Uquçıları belän Äytmätovnıñ öyen qarawçı Bişkäk 58nçe däwlät mäktäbe mödire Almagül İsrailova “Anadolu” agentlığına yasağan belderüendä: "Bügen bezneñ öçen bik ğorurlıq birüçe kön. 12nçe dekabr’ - Çıñğız Äytmätovnıñ tuğan köne. Äytmätov isän bulsa ide 89 yäşendä bulaçaq ide. Äytmätov tuıp üskän cirlärdä yäşäwdän bik ğorurlanam. Äytmätov – barı tik Qırğızstannıñ ğına tügel, böten törki dönyanıñ ğorurlıq çığanağı. Äytmätov qırğız-törek duslığınıñ küperen täşkil itä”, - dip äytte.

Milli fännär akademiyasında da Äytmätovnıñ äsärläre tanıtılğan kürgäzmä oyıştırıldı. Çarada ministrlar häm küp sanda ğalim qatnaştı.

Äsärläre 150dän kübräk telgä tärcemä itelgän Äytmätov 2008nçe yılda säfärgä çıqqan Tatarstan başqalası Qazanda kinät kenä awırıp kitep, annan soñ däwalanuı öçen alıp barılğan Germaniyada 10nçı iyün’dä 79 yäşendä wafat bulğan ide.

Äytmätovnın öç ulı häm ber qızı bar.