Ärdoğannıñ Törkiyä-Qırğızstan êş forumındağı çığışı

Ul säwdä äyläneşendä cirle milli aqçanı qullanunı alğa sörde

Ärdoğannıñ Törkiyä-Qırğızstan êş forumındağı çığışı

İlbaşı Räcäp Tayyip Ärdoğan dön’ya säwdä äyläneşendä dollarnıñ xakimlegenä çik quyarğa kiräklegen belderde. Bu xaqta ul Bişkäktä ütkän Törkiyä-Qırğızstan êş forumındağı çığışında söyläde. İlbaşı dön’ya iq’tisadı sistemasınıñ yaña ber sınaw ütüen assızıqladı. “Xalıqara säwdäneñ dollarğa bäylelege zur qıyınlıq xälenä kilde. Üz arabızda cirle milli aqçanı qullanıp bu wäzğıyät’kä çik quyarğa kiräk,”-dide ul.  

Ärdoğan Törkiyä soñğı atnalarda duçar bulğan höcümnärneñ monıñ iñ açıq ürnäge buluına basım yasadı. “Bu manipulyaśiyälär Törkiyäneñ nıq iq’tisadı östendä şöbhä bolıtları quyırtırğa mataşa. Kredit däräcäsen bilgeläwçe oyışmalar bar, alarnıñ här adımı säyäsi. Alar fokusçı. Bu fokusçılarğa ışana kürmägez. Valyuta kursı höcümeneñ maqsatı - Törkiyäne iq’tisadi yaqtan qulğa töşerü. Kurs basımı barı tik bezneñ problema tügel,”-dip söyläde Törkiyä ilbaşı.    

Ärdoğan üz çığışında turizmğa da qağıldı. Ul Törkiyäneñ bıyıl 40 million turist qabul itüen äytep ütte.

Saqlanu sänäğatenä kilgändä, ilbaşı beldergänçä, Törkiyäneñ üz-üzen täêmin iteşe 65 % qa citte. Ärdoğan Rusiyä belän tözelgän S-400 raketa sisteması kileşüen qayberäwlärneñ oşatmawın da söyläde. “İxtıyacıbıznı qanäğat’länderäbez, beräwdän dä röxsät alırğa cıyınmıybız,”-dide ul.  

Ärdoğan dus däwlätlärgä Färxullaxçı terror oyışması mäs’äläsendä dä möräcäğaten citkerde. “İkeyaqlı xezmättäşlegebezne ağulağan FETÖ yılanının başın izep, bu yanawnı yuqqa çığarırğa kiräk. Älege oyışma äğ’zalarınıñ hiçber dus ildä qulların selkep gizülären telämibez,”-dip belderde ilbaşı.



Bäyläneşle xäbärlär