Üzbäkstanda atom-töş ênergiyäsen üsterü ağentlığı

Üzbäkstanda atom-töş ênergetikası tarmağın üsterü yünäleşendä Üzatom atom-töş ênergiyäsen üsterü ağentlığı tözeläçäk.  

İlbaşı Şäwkät Mirzizoyev bu xaqtağı qararnamäne imzaladı. Monıñ belän ul atom-töş ênergiyäsen tınıç maqsatlarda qullanuçı agentlıqnıñ tözelüen uñayladı. Oyışma xökümätkä bäyle räweştä êşli. Agenlıq ildä atom-töş ênergiyäsen üsterü, qullanu häm bu mäs’älädä däwlät säyäsäten buldıru, strategiyäne bilgeläw häm tormışqa aşıru öçen cawaplı bulaçaq. Ul, şulay uq, çit il investorların tartu öçen kiräkle cirlek äzerläyäçäk. Atom-töş fäne häm texnologiyälären üsterügä yünälgän tikşerenülär häm yaña proyektlar tormışqa aşıru da oyışma östendä. Tarmaqta êşläyäçäk xezmätkärlärne citeşterü öçen çit illärgä belgeçlär cibäreläçäk.

Ministrlar şurası 1nçe oktyabr’gä qadär “Atom-töş ênergiyäsen tınıç maqsatlarda qullanu”ga yünälgän qanunnı äzerläp parlamentqa täq’dim itäçäk. Üzatom yıl axırına qadär ilneñ 10 yıllıq atom-töş ênergiyäse konśeptın, 2019nçı yılnıñ 1nçe iyünenä qadär tarmaqqa kertem proyektların, 2019nçı yılnıñ 1nçe noyabrenä qadär isä däwlät programması proyektın äzerläyäçäk.      

Üzbäkstan xökümäte 2017nçe yılda Rusiyä atom-töş ênergetikası oyışması Rosatom belän xezmättäşlek turında kileşü imzaladı. Anıñ qısalarında Rosatomnıñ Üzbäkstanda 2 bloktan toruçı atom-töş stanśiyäsen tözep, 2028nçe yılğa qadär êşlätä başlawı planlaştırıla.