Törek matbuğatına küzätü 08.07.2014

8nçe iyul könne basılıp çıqqan qayber törek gazetlarına küzätü

Törek matbuğatına küzätü 08.07.2014

“Yäni Şafak” gazetı Fälästinle yeget Möxämmäd Äbu Hudayrnıň Könçığış Yeruslimda urlanıp, üterelgännän soň qulğa alınğan 6 ğayeplänüçedän öçeseneň üz ğayeplären tanuların yaza.

Gazet İzrailda çığuçı “Haaretz” gazetınıň internet säxifäsendäge xäbärenä kürä yäş yegetne üterülären qabul itkän ğayeplänüçelärneň politsiya tarafınnan waqiğa urınına alıp barıluın citkerä.

“Vatan” gazetı “Qoyıluçı möselman qanın tuqtatırğa tırışaçaqbız” isemle xäbärendä Äl Cäzirä televideniyesınıň Törkiyä Diyanät eşläre başlığı Prof. Dr. Mäxmät Görmäz belän ütkärgän äňgämäne citkerä.

Gazet Mäxmät Görmezneň: “Bu aynıň 17esendä Awraziya geografiyasendäge barlıq dini oyışmalar belän bäreleş töbägendäge illärneň ğalimnären çaqırdıq. Qoyıluçı qannı tuqtatırğa telibez,” – digän süzlären uquçıları belän urtaqlaşa.

“Yäni Şafak” gazetı “Kömeş tölkedän xuşlaşu” isemle xäbärendä Gruziyaneň elekke däwlät başlığı Eduard Şevardnadzenıň 86 yäşendä yaqtı dönyadan kitüen yaza.

Gazet Şevardnadzenıň ozaq waqıt däwalanu astında buluın belderä.

“Milliyät” gazetı “Törek dustı, yazuçı Mango belän xuşlaşu” isemle xäbärendä Atatörek xaqında yazğan biografiya kitapları belän tanılğan ingliz tarixçı häm yazuçı Andrew Mangonıň aldağı könne 88 yäşendä ğomereneň özelüen belderä.

Gazet 1926nçı yılda İstanbulda tuğan Mangonıň 1940nçı yıllarda Angliyanıň Änkaradağı ilçelegendä wazifa başqaruın xäterlätä.

Gazet 14 yıl buyı BBCdağı törekçä efir bülege belän citäklägän Mangonıň layıqlı yalğa çıqqannan soň Törkiyägä yış kilüen häm Törkiyä belän bäyle mäs’älälärdä eşçänlek başqaruın xäbär itä.

“Star” gazetı “Paqıstannan Törkiyägä poyezd säfäre” isemle xäbärendä 2009nçı yılda başlanğan, läkin 2011dä törle säbäplär arqasında tuqtap qalğan Törkiyä-Paqıstan arasındağı konteyner poyezdlarınıň qabat yulğa çığaçağın yaza.

Gazet Paqıstanlı çığanaqlarnıň eşçänleklärneň tizlänüen belderep, kötelgännän tağın da qısqa waqıtta säfärlärneň başlayaçağın äytüen citkerä.

“Akşam” gazetı iqtisad säxifäsendä urın alğan “Çit il banklarınıň qızıqsınuı däwam itäçäk” isemle xäbärendä italiyan UniCredit bankınıň ğomüm mödire Federrico Ghizzoninıň ber televideniye kanalına yasağan äňgämäsendä çit il banklarınıň Törkiyägä qızıqsınu kürsätergä däwam itteräçägen äytüen yaza.

Gazet Chizzonineň: “Törkiyä - bez üseş alaçaq 3-4 ildän berse. Qalğan çit il bankları da Törkiyäneň işegen qağaçaq. Bu mägnädä İntenzanıň da bülek açaçağına şatlandıq,” – digän süzlärenä urın birä.

 


Etiketlar:

Bäyläneşle xäbärlär