• Video galereyası

AQŞ senatorları prinśqa qarşı

Alar Qaşıqçını üterü belän bäyle fikerlären citkerde

AQŞ senatorları prinśqa qarşı

AQŞnıñ Kön’yaq Karolina senatorı Lindsey Grêxêm jurnalist Cämal Qaşıqçınıñ üterelüennän Soğud Ğaräbstanı täxet varisı Möxämmät bin Sälmannıñ xäbärdar bulmawına ışanmawın äytte. Ul bu xaqta NBC N’yus kanalına belderü yasadı. Cömhüriyätçe senator Üzäk küzläw oyışmasınnan älege cinayät’ turında mäğ’lümat almawın söyläde. “Başınnan birle ük 15läp keşeneñ täxet varisına äytmiçä häm anıñ ämerennän başqa oçqıçqa utırıp kitep prinśnıñ möhim oppoziśionerın turawlarına ışanmıym,”-dide ul.

Grêxêm Soğud Ğaräbstanı häm täxet varisı turında beraz mäğ’lümatı bulğan ber keşeneñ dä moña ışanmayaçağın äytep uzdı.   

“Ägär Soğud Ğaräbstanınıñ yaña yöze häm tawışı Möxämmät bin Sälman bulsa, patşalıq dön’ya külämendä bik awır zamannar kiçeräçäk. Alar ähämiyätle berlektäş, ämma täxet varisına kilsäk - ul irraśional’, awmaqay, ışanıçsız keşe häm AQŞ belän Soğud Ğaräbstanı mönäsäbätlärenä zur zarar birüen uylıym. Anıñ belän qabat xezmättäşlek itärgä niyätem yuq,”-dip söyli senator.

Arizona ştatınıñ cömhüriyätçe senatorı Djeff  Flêyk isä AQŞ ilbaşı Donal’d Trampnıñ Soğud Ğaräbstanın “iskitkeç berlektäş” dip atawın tänqıyt’li. Ul Qaşıqçını üterü ämeren täxet varisı Sälmannıñ birüen häm AQŞnıñ axırdan bu çınbarlıqnı tanıyacağın äytä.  

Kaliforniyäne wäkillek itüçe demokrat Adam Şiff isä, matbuğatta belderü yasap, Üzäk küzläw oyışmasınıñ Qaşıqçı cinayäte belän bäyle mäg’lümatın tıñlawın häm jurnalistnı üterüdä täxet varisınıñ qatışı bulmawın başına sıydıra almawın söyläde.

Şiff  “Doşmanımnıñ doşmanı - minem dus” digän ğıybaräne iskä töşerä. “İran bezneñ doşmanıbız. Soğud Ğaräbstanı İranğa qarşı toru mäs’äläsendä bezneñ öçen ähämiyätle, ämma bu Soğud Ğaräbstanı bezneñ dustıbız digän süz tügel, duslarıbız jurnalistlarnı ütermäs,”-di ul.

Kaliforniya ştatı wäkillärennän demokrat Ted Liu fikerlären Twitter aşa belderde. Ul anda AQŞ däwlät departamentınıñ CİA brifinğınnan soñ yasağan “AQŞ xökümäteneñ azaqqı näticägä kilüe turındağı soñğı xäbärlär döres tügel” digän açıqlawın tänqıyt’läde.

“Xörmätle däwlät departamentı, soğudlılar Qaşıqçınıñ üterelmäwe turında 17 kön buyı sezgä yalğan söyläde. Soñınnan xikäyälären küp tapqır üzgärttelär. Sez, çınlap ta, CİAğa tügel, soğudlılarğa ışanasızmı? Sezneñ êşegez AQŞnı wäkillek itü, Soğud Ğaräbstanın tügel,”-dide Ted Liu.



Bäyläneşle xäbärlär