Pamukkalä/ Xierapolis

Törkiyädä turizm 7

Pamukkalä/ Xierapolis

 Pamukkalä -Törkiyäneñ iskitkeç tabiği maturlıqqa iyä cirleklärennän berse. Töbäktäge Xierapolis antik şähäre belän bergä 1988 nçe yıldan birle YUNESKOnıñ Bötendönya miras isemlegendä urın ala,häm mädäni, häm tabiği miras bularaq qabul itelä.

Pamukkalä Törkiyäneñ könbatışında Ägäy töbägendä Dänizli vilayätendä urın ala. Biredäge travertinnar (izvest’le utırmalar) iskitärlek manzara barlıqqa kiterä.

Pamukkalä travertinnarı 2700 metr ozınlığında häm 160 metr biyeklegendä. Şuña kürä aq töstä yaltırap toruçı bu izvest’le utırmalarnı şaqtıy yıraqtan da kürergä mömkin.  

Dänizligä 2 çaqrım yıraqlıqta urnaşqan bu cirlek törle awırularğa faydalı bulğan şifalı suları belän dä tanılğan. Bireda cılılıqları 35-36 gradus bulğan 5 su çığanağı bar.

Töbäktäge Xierapolis antik şähäre borınğı zamannardan bügenge köngä qadär kilep citkän iñ möhim üzäklärdän berse. Älege antik şahärneñ miladqa qadär 2 nçe ğasırda Pergama patşası Êvmen 2 nçe tarafınnan qorıluı , isemen isä Pergamanıñ qoruçısı Telephosnıñ xäläl cefete Heiradan aluı farazlana.

Xristianlıqnı cäyelderüdä möhim rol’ başqarğan  Xierapolis şul uq waqıtta Ğaysäneñ 12 apostolınnan berse bulğan İzge Filipp üterelgän şähär dä.

Çığanaqlarda äytelgänçä,  Xierapolis üz waqıtında metal häm taş sänğäte,tuqıma êşlänmäläre belän dä tanılğan şähär bulğan.

Tiñsez maturlıqqa iyä Pamukkalä häm antik şähär Xierapolisqa kiläsez ikän töbäktäge şifalı sulardan faydalanırğa ,ap-aq travertinnarğa basıp qoyaş batqanın küzätergä , yaqın tirädäge mäğarälär häm şarlawıqlarnı da qararğa onıtmağız.

Dänizlineñ  mäşhür tuqılğan êşlänmälären satıp alırğa, cirle rizıqlardan pidä häm kebab belän sıylanırğa da kiñäş itäbez.  



Bäyläneşle xäbärlär