• Video galereyası

Törkiyädä tatar cıyınnarı (ğinwar’-fevral’ 2018)

“Törek wä tatar dönyasında” tapşıruı. 25.02.2018

Törkiyädä tatar cıyınnarı (ğinwar’-fevral’ 2018)

Törek wä tatar dönyasında - 2018/02

Ali Aqış 100 yıllığında iskä alındı

2018nçe yılnıñ 14nçe ğinwar könne kürenekle cämäğät êşleklese, ädip häm yazuçı Ğayaz İsxaqineñ warisçısı, Bötendönya tatar ligasınıñ berençe qoruçı başlığı, yazuçı häm jurnalist Ali Aqışnıñ tuuına 100 yıl tuldı.

Tanılğan cämäğät êşleklese Ali Aqışqa 100 yıl tulu mönäsäbäte belän 2018nçe yılnıñ 14nçe ğinwar könne Törkiyäneñ İskeşähär qalasında iskä alu kiçäse ütkärelde.

İskeşähär tatar cämğiyäte, Bötendönya tatar ligası häm İskeşähär Törek uçaqları oyıştırğan çarada tanılğan cämäğät êşleklese, ğalim Sadri Maqsudineñ onığı yazuçı Gönül Pultar, mäşhür tyurkolog häm mongoloid professor Äxmät Timerneñ qızı Bahşayiş Timer Fıratoğlu, Tatarstannıñ Törkiyädäge tulı wäqalätle wäkile urınbasarı Al’bert Yalışev häm wäkilçelek kiñäşçese Haqan Coşkun da qatnaştı.

Tatar cämğiyäte wäkilläre häm Ali Aqışnı iskä alu çarasına kilgän qunaqlar belän Qazan tatarları muzeyı urnaşqan Odunpazarı (utın bazarı) rayonı başlığı, çığışı belän qırım tatarı bulğan Kazım Kurt küreşep söyläşte. Oçraşu waqıtında şuşındıy çaralarnıñ yışraq ütkärelüe teläge belderelde.

İskeşähär Qazan tatarları cämğiyäte başlığı Rawza Mällä häm urınbasarı Muhsin Bänäklitaş kilgän qunaqlarğa cämğiyät êşçänlege häm şähärdäge tatarlar turında mäğlümat birde, qazan tatarları muzeyın gizderde.

Bötendönya tatar ligası başlığı, ğalimä häm yazuçı Gönül Pultar Ali Aqışnıñ tormışın, äsärlären häm êşçänlegen tanıttı, Tatarstandağı milli oyışmalar häm İdel-Ural töbägendäge wazğiyät turında mäğlümat birde.

Kiçä barışında olı şäxesneñ Änkaradağı 94 yäş’lek bertuğan señlese Säidä Aqış ta telefon aşa üz fikerlären citkerde.

“İskeşähär Törek uçağı” cämğiyäteneñ konferenśiya zalında uzdırılğan iskä alu kiçäsendä Ali Aqış belän bäyle videoyazma täqdim itelde.

Kiçäne tögälläp, “İskeşähär Törek uçağı” cämğiyäte başlığı, professor doktor Nädim Ünal isä, cıyınğa kilüçelärgä räxmätlären citkerep, “Törek uçağı” cämğiyätenä nigez saluçılardan berseneñ mäşhür tatar ğalime Yosıf Aqçura buluın xäterlätep, mondıy cıyınnarnıñ möhimlegenä häm zarurlığına basım yasadı.

Ali Aqışnı iskä alu kiçäseneñ axırında cıyında çığış yasawçılarğa istälekle yazular häm çäçäk bäylämnäre tapşırıldı.

 

Şihabetdin Märcäni häm Ğayaz İsxaqi iskä alındı

2018nçe yılnıñ 10nçı fevral’ könne İstanbulnıñ Topkapı törki dönya mädäniyät mäxälläsendä tuuınıñ 200 yıllığında tatar xalqınıñ mäşhür mäğrifätçese, tarixçısı häm ğalime Şihabetdin Märcäni häm tuuına 120 yıl tulu mönäsäbäte belän tanılğan yazuçı häm cämäğät êşleklese, milli azatlıq xäräkäteneñ äydäp baruçısı Ğayaz İsxaqi iskä alındı.

Tatarstannıñ Törkiyädäge wäkilçelege, İstanbul şähär xakimiyäteneñ “Mädäniyät” akśionerlıq cämğiyäte, İdel-Ural törkiläre mädäniyät häm yärdämläşü cämğiyäte belän Ayaz Tahir Törkistan İdel-Ural waqıfı oyıştırğan kiçädä Tatarstannıñ Törkiyädäge tulı wäqalätle wäkile Ayrat Ğataullin, Topkapı törki dönya mäxälläse mödire Salih Doğan häm İdel-Ural törkiläre cämğiyäte başlığı Göltän Urallı açılış çığışların yasadı. Märmär universitetı möğallimäse, fännär doktorı Läysän Şahin Şihabetdin Märcäni tormışın, äsärlären, êşçänlegen kin qırlı itep añlatıp birde.

Ayaz Tahir Törkistan İdel-Ural waqıfı başlığı doktor Tülay Duran iskä alu kiçäsendä yasağan çığışında Ğayax İsxaqi turında mäğlümat birde.

Tatarstannan Ğalimcan İbrahimov isemendäge Tatar ädäbiyat häm sänğät institutınıñ ölkän fänni xezmätkäre professor doktor Zöfär Rämiyev isä Ğabdulla Tuqaynıñ törki dönyağa yoğıntısına bağışlağan çığışında Tuqaynıñ Şihabetdin Märcänigä yazğan şiğeren dä uqıdı.

Törkiyädä belem aluçı tatar qızı Aygöl Kabirova alıp barğan kiçä “Tuğan tel” belän tögällände.

 

“Äxmät Timer häm İdel-Ural törkilege”

2018nçe yılnıñ 15nçe fevral’ könne Törkiyäneñ İskeşähär qalasında tanılğan tatar ğalime Äxmät Timer iskä alındı.

İskeşähär Törek uçağı cämğiyäteneñ konferenśiyälär zalında uzdırılğan cıyılışta mäşhür tyurkolog häm mongoloid professor Äxmät Timerneñ qızı Bahşayiş Timer Fıratoğlu “Ätiyem Äxmät Timer häm İdel-Ural törkilege” isemle temağa çığış yasadı.

 

Üzeneñ çığışında Bahşayiş xanım ätiseneñ Tatarstandağı, Germaniyadağı häm Törkiyädäge tormışın añlattı, fänni êşçänlege häm äsärläre turında mäğlümat birde.

Tatarlar belän bäyle bularaq Törkiyädä ğinwar’ häm fevral’ aylarında uzdırılğan qayber çaralarğa qısqaça küzätüne TAWIŞ UYNATQIÇINNAN tıñlıy alasız.

 

 

FotosürätlärGöltan Urallı, Häyretdin Güläçyüz, Ayziräk Gäräyeva, Muhsin Bentaş, “İskeşähär Törek uçağı” cämğiyäte häm Säğit Xäyrineñ “Facebook” säxifälärennän alındı.

Törkiyädä tatar cıyınnarı (ğinwar’-fevral’ 2018) (latin) / Kiril variantı tübändäge sıltamada:Төркиядә тaтaр җыeннaры (гыйнвaрь-фeврaль 2018) | TRT  Тaтaрчa

 


Bäyläneşle xäbärlär