“Tartarika" tarix atlasınıň törek telenä tärcemäse tanıtıldı

“Törek wä tatar dönyasında” tapşıruı

“Tartarika" tarix atlasınıň törek telenä tärcemäse tanıtıldı

 

Törek ğalimnäre professor doktor İlbär Ortaylı häm professor doktor Taşansu Türkär Yunıs Ämrä isemendäge  institut yärdäme belän ütkärelgän çara qısasında 9 nçı oktyabr’dä Qazan federal’ universitetı Xalıqara mönäsäbätlär häm tarix institutı möğallimnäre häm uquçı yäş’läre öçen konferenŝiya ütkärde.Qunaqlarnı Tatarstannıň berençe ilbaşı häm däwlät kiňäşçese Mintimer Şäymiyev tä qabul itte.  İlbär Ortaylı Tatarstan belän bäyle uy fikerlären soňınnan “Qazan köndälege: ber ayağı könçığışta, ikençese könbatışta” isemle yazmasında citkerde.

 

10 nçı oktyabr’dä İstanbulnıň Dolmabahçe sarayınıň kürgäzmä zalında “Tartarika” tarix atlasınıň törek telenä tärcemäsen tanıtu kiçäse uzdı. Älege proyekt Törki dönya muniŝipalitetları berlege häm Tatarstan fännär akedemiyası Şihabetdin Märcäni isemendäge Tarix istitutı tarafınnan “Kastamonu integraŝiya” şirkäte yärdäme belän tormışqa aşırıldı. Äsärne törek telenä ğalim İl’yas Kamalov tärcemä itte.Tanıtu çarasında Törkiyäneň  Qazandağı baş konsulı Turhan Dilmaç,Rusiya Federŝiyäseneň İstanbuldağı baş konsulı Andrey Pod’yelışev, Tatarstannıň Törkiyädäge wäqalätle wäkile Ayrat Ğataullin,Tatarstan fännär akademiyäse Şihabetdin Märcäni isemendäge Tarix institutı mödire Rafaêl’ Xäkimov,İRSİKA mödire Halit Ärän ,professor doktor İlbär Ortaylı,Törki dönya muniŝipalitetları berlege baş särqätibe Fäxri Çolak, İstanbul Zäytünburnu rayon xakimiyät başlığı Murat Aydın, Qazan federa’ universitetı uqıtuçı-ğalimnäre ,Törkiyäneň yuğarı uqu yortlarınnan ğalimnär häm törek-tatar mädäni üzäkläre wäkilläre qatnaştı.

“Tartarika” tarix atlası illyustraŝiyälärgä häm tarixi kartalarğa bik bay. Äsärdä tatar xalqı tarixı häm ğomumtörki tarixqa qağılışlı mäğ’lümatlar urın ala.

 

Tatarstan ilbaşı Röstäm Miňnexanov 15 nçe oktyabr’dä Soçida 19 nçı Bötendönya yäş’lär häm studentlar festivaleneň Tatarstan delegatları belän oçraştı. Älege çarağa Tarastannan 200 delegat häm 180 volontyer kilde. Festival’ qısasında Rusiya töbäkläreneň “YOUTH EXPO” kürgäzmäse uza. Biredä här töbäk üz qazanışların täq’dim itä. Röstäm Miňnexanov forum delegatlarına uňışlar teläde häm soňınnan bergäläşep istälekkä fotoräsemgä töşelde.

 

Törkiyäneň Änkarağa bäyle Qaharmanqazan ilçäsendä “5 nçe xalıqara êtnik mädäniyat häm sänğät’ çaraları” isemle simpozium uzdı. Çara törle xalıqlarnıň Êtnik mädäniyatın xalıqara däräcädä tanıtunı maqsatı belän ütkärelde. Simpoziumnı Gazi universitetınıň sänğät’ häm dizayn fakul’tetı oyıştırdı. Çarada tatar xalqı mädäniyatı belän bäyle çığışlar da täq’dim itelde. Tatarstannan İslam universitetı uqıtuçı-ğalimäse Gölnara Ğaynetdinova “Tatarstan xalqınıň matdi bulmağan mädäni mirasın saqlaw çaraları” digän temağa, Tatarstan Fännar akademiyäse doŝentı Färidä Tahirova “Tatar tel belemendä sölgelär” isemle çığış yasadı. Simpoziumda Törkiyäneň Kars qalasındağı Kavkaz universitetı uqıtuçısı tatar qızı Çulpan Zaripova Çätin dä “Ğalimcan İbrahimovnıň “Tatar xatını nilär kürmi” asärendä tatar xalıq ädäbiyatı ürnäkläre” isemle çığışın täq’dim itte.

 

14 nçe oktyabr’dä Qazannıň Kärim Tinçurin baqçasında Xäter könenä bağışlanğan cıyın uzdı.  

Cıyında tatar tele, millät yazmışı temaları kütärelde.

Xäter köne 1552 nçe yılnıň 12 nçe oktyabrendä Qazan şähären yaqlağanda hälaq bulğannarnı iskä alu köne bulıp isäplänä. Tatarstanda bu kön 1989 nçı yıldan birle bilgeläp ütelä. Bıyıl İvan Groznıynıň Qazan xanlığın aluına 465 yıl tuldı.

 15 nçe oktyabr’ – Xäter köne uňayınnan Bötendönya tatarlar ligası räise Gönül Pultar soŝial’ media aşa tatar xalqına yullama yasadı. Gönül Pultar üz yullamasında kiläçäkkä ömet belän qarawın, tatar milläten yaqtı könnär kötkänenä ömetlänüen belderep, berdämlekkä öndäde.


 

 



Bäyläneşle xäbärlär