“Törkiyä - Tatarstan öçen bik möhim partnyor”

Törki dönya xäbärläre 35

“Törkiyä - Tatarstan öçen bik möhim partnyor”

İzmir-Tatarstan êş forumı

Tatarstan Premyer-ministr urınbasarı, Sänäğät häm säwdä ministrı Albert Kärimov: "Törkiyäneñ iñ qamilläşkän töbäklärennän berse bulğan İzmir belän xezmättäşlekneñ üsterelüen telibez,” – dip äytte.

İzmir säwdä palatasınıñ räislegendä İzmir-Tatarstan êş forumı ütkärelde.

Kärimov biredä yasağan çığışında, Törkiyäneñ Tatarstan öçen bik möhim säwdä, iqtisad häm mädäniyät partnyorı buluın belderep, uzğan yılda Törkiyä belän 200 million dollardan tağın da kübräk tışqı säwdä külämenä ireşülären äytte. Bu külämne tağın da kübäytäçäk potenśial buluın assızıqlawçı Kärimov Törkiyäneñ iñ küp üseş alğan töbäklärennän berse bulğan İzmir belän xezmättäşlekneñ qamilläşterelüe öçen teläkläre buluın belderde.

Kärimov, ike il arasında mädäni häm dini şaqtıy urtaq yaqlarnıñ buluına iğtibarnı yünältep, bügen tözeläçäk xezmättäşlek kileşüläreneñ plannarnı häm proyektlarnı tağın da anıq qılaçağın assızıqlap äytep uzdı.

Tatarstan säwdä häm sänäğät palatası başlığı Şamil Ageyev (Ageev) ta, küp tapqırlar Törkiyä iqtisadınıñ ni çaqlı dinamik üseş aluına şahit buluların añlatıp, törek êşmäkärläreneñ Tatarstanda uñışlı räweştä êşlären alıp baruına iğtibarnı yünältte häm: "Här ölkädä xezmättäşlek urnaştıra alabız”, - dip basım yasadı.

İzmir säwdä palatasınıñ idarä şurası başlığı Äkräm Dämirtaş isä Tatarstan belän Törkiyäneñ uzğan çaqlardan bügenge çaqlı yaxşı mönäsäbätlär êçendä buluın belderde.

İzmirneñ 4 million xalıq sanı belän Törkiyäneñ iñ zur öçençe qalası buluına işäräläwçe Dämirtaş şähärdä 13 oyışqan sänäğät töbäge, 2 irekle töbäk, 4 texnologiya qamilläşterü töbäge buluına iğtibarnı yünältte. Dämirtaş İzmirneñ barı tik sänäğättä genä tügel, igençelektä dä uñışlı buluın däğwalawın assızıqlap: "Ägäydä êşläp çığarılğan mamıq, incir, yözem, tämäke, zäytün häm zäytün mayı yuğarı sıyfatları belän dönyaküläm tanılğan häm Ägäy igençelek sänäğäteneñ nigezen täşkil itä. Yäğni här ölkädä dä xezmättäşlek urnaştıra alabız häm moña äzerbez”, - dip äytte.

Çığışlardan soñ Tatarstan säwdä häm sänäğät palatası belän İzmir säwdä palatası arasında "qardäş-tuğandaş palata" kileşüenä qul quyıldı. Tatarstan investiśiya agentlığı başlığı Taliya Miñnullina Tatarstannıñ iqtisadi potenśialın añlattı. Programma qısalarında İzmir häm Tatarstan firmaları arasında ike yaqlı êş söyläşüläre ütkärelde.

Qazaqstan küpme neft’ êşkärtkän?

Qazaqstan 6 ayda 7 million 300 meñ  tonna neft’ êşkärtkän.

Qazaqstannıñ bıyıl berençe yartıyıllıqta êşkärtelgän neft’ miqdarınıñ 5,4% artış belän 7 million 338 meñ tonnağa citüe belderelde.

Qazaqstan ênergetika ministrlığınnan yasalğan belderüdä bıyıl ğinwar’-iyün’ aylarında Pavlodar neft’ häm ximiya êşxanäsendä 2 million 648 meñ tonna, “Neft’ Qazaqstan Oil” êşkärtü qorılmasında 1 million 895 meñ tonna, Atırau êşkärtü qorılmasında 2 million 508 meñ tonna häm başqa waq êşxanälärdä dä 287 meñ tonna buluı belän bergä cämğise 7 million 338 meñ tonna neft’neñ êşkärtelüe äytelde.

Şuşı çorda ildä 1 million 544 meñ tonna benzin, 110 meñ tonna reaktiv yağulığı, 2 million 127 meñ tonna motorin-dizel’ häm 1 million 515 meñ tonna da törle yağulıqnıñ êşläp çığarıluı assızıqlandı.

Êşläp çığarğan neft’neñ möhim öleşen êşkärtelmägän matdä bularaq êksportlawçı Qazaqstan soñğı waqıtlarda neft’ êşkärtelüeneñ ildä başqarıluına östenlek birä.

Qazaqstan belän Üzbäkstan arasında saqlanu xezmättäşlege urnaştırıldı

Üzbäkstan häm Qazaqstan saqlanu ministrlıqları arasında xezmättäşlek planı imzalandı. Üzbäkstan saqlanu ministrlığınnan yasalğan belderügä kürä, Qazaqstan saqlanu ministrı Saken Casuzakov belän Üzbäkstanlı xezmättäşe Qabul Bärdiev başqala Taşkentta oçraştı.

Oçraşu waqıtında Üzbäkstan belän Qazaqstan arasındağı xärbi xezmättäşlekne qarap çıqqan ike ministr töbäktäge xärbi-säyäsi wazğiyätne küzdän kiçerde. Söyläşüdän soñ Bärdiev häm Casuzakov ike il saqlanu ministrlıqları arasındağı mönäsäbätlärneñ tağın da üsterelüen küzdä totuçı saqlanu xezmättäşlege planına imza saldı.

Fotosürättä: Tatarstan Premyer-ministr urınbasarı, Sänäğät häm säwdä ministrı Albert Kärimov (uñda) belän Tatarstan İlbaşınıñ xalıqara häm tışqı iqtisadıy mäs’älälär yärdämçese Radik Ğimatdinov (sulda) Törkiyäneñ İzmir qalasında.

Fotosürät tatarstan.ru säxifäsennän alındı.



Bäyläneşle xäbärlär