Qazaqstannıñ xalıq sanı artqan

Törki dönya xäbärläre 32

Qazaqstannıñ xalıq sanı artqan

Törekmänstan

Berläşkän Millätlär Oyışması ğomum särqätibe Aşxabad säfäre waqıtındağı qunaqçıllığı öçen Törekmänstan däwlät başlığına räxmätlären citkerde.

Urta Aziya turı qısasında 13 nçe iyün’dä Törekmänstanğa säfär qılğan Berläşkän Millätlär Oyışması ğomum särqätibe Antonio Guterres Törekmänstan däwlät başlığı Gurbanguli Bärdimöxämmädovqa xat cibärep Aşxabad säfäre waqıtında cılı qarşı aluı häm qunaqçıllığı öçen räxmät beldergän.

Törekmänstan däwlät xäbärläre agentlığı xäbärenä kürä ğomum särqätip üz xatında Törekmanstan citäkçelegeneň däwam itterelä ala torğan qalqınu, tranzit transport, terrorğa qarşı köräş,regional’ xezmättäşlekne nığıtu kebek urtaq maqsatlarğa yünälgän êşçänleklären yuğarı bäyäläwen assızıqladı.

Törekmänstannıň “Berläşkän Millätlär Oyışması global’ terrorçılıqqa qarşı köräş strategiyäse” qısasında “BMO-Urta Aziya dialogı”n däwam itterügä yaqlawınıň möhimlegenä basım yasağan Guterres ,13 nçe iyün’dä Aşxabadta ütkärelgän cıyılış azağında qabul itelgän urtaq beldergeneň Urta Aziya illäreneň barısınıň BMO belän terror häm başqa yanawlarğa qarşı koordinaŝiyäle köräş öçen xezmättäşlek başqarırğa äzer bulularınıň açıq kürsätkeçe buluın citkerde.

13 nçe iyün’dä Aşxabadta Urta Aziya illäre tışqı êşlär ministrları häm başqa räsmi zatlar qatnaşında uzğan “BMO - Urta Aziya yuğarı däräcäle dialog cıyılışı”nda töbäk illärenä yoğıntı yasawçı terrorçılıq yanawları bäxäsläşelgän häm terrorğa qarşı köräştä xezmättäşlekne  däwam itterü turındağı urtaq belderge qabul itelgän ide.

 

Üzbäkstan

Üzbäkstan belän Qırğızstan çik buyı mäs’äläse xaqında söyläşte. İke ilneň urtaq êşçänlek törkemnäre 9 kön buyı bäxäsle töbäklärdä ike il arasındağı çiklärne bilgeläw xaqında süz alıp bardı.

Üzbäkstan tışqı êşlär ministrlığı beldergänçä, ike il xökümätläre buldırğan urtaq êşçänlek törkeme uzğan atnada Qırğızstannıň Bişkäk qalasında oçraştı.

Älege törkem Üzbäkstan - Qırğızstan däwlät çiklären bilgeläw xaqında 9 kön buyı söyläşülär alıp bardı.

Tradiŝion duslıq häm partnyerlıq atmosferasında uzğan söyläşülärdän soň êşçänlek näticäläre xaqında protokol imzalandı.

Êşçänlek qısasında Qırğızstan prem’yer-ministrı Sooronbay Cäänbäkov Üzbäkstan wäkillege başlığı İlham Nämatov belän Qırğızstan wäkillege başlığı Kurbanbay İskändärovnı qabul itte.

Oçraşuda prem’yer-ministrğa söyläşülär xaqında mäğ’lümat birelde.

Nämatov prem’yer-ministr urınbasarı Cäniş Razzakov belän küreşep çik buyı mäs’äläse xaqında söyläşte.

Üzbäkstan – Qırğızstan urtaq êşçänlek törkeme aprel’ häm may aylarında çik buyın bilgeläw belän bäyle mäydan häm topografiya êşçänlekläre alıp barğan ide.

Yaqlar uzğan yılnıň noyabr’ ayında Färganä qalasında ütkärgän cıyılışta bäysezlek alularınıň täwge yıllarınnan başlap xäzerge waqıtqa qadär ike il arasında bäxäsle 7 çik buyı noqtasında kileşügä ireşkän bulğan , şulay itep ike il üzara kileşü täêmin itkän çik buyı noqtası sanı 56 ğa citkän.

1991 nçe yılda bäysezlek aluğa ireşkän Üzbäkstan belän Qırğızstan arasında 1378 çaqrım ozınlığında çik bar. Yaqlar bäysezlek alğannan soň çiklärne bilgeläw êşçänlekläre başlatqan bulsalar da çik buyınıň 300 çaqrımlıq öleşendä äle haman da kileşügä ireşelmäde.

 

Qazaqstan

Qazaqstannıñ xalıq sanı 2017nçe yılnıñ 1nçe iyünendä  18 million 14 meñgä citkän.

Bu xaqta Qazaqstan milli statistika oyışması beldergän.  Mäğ’lümatlardan kürengänçä, ilneñ xalıq sanı uzğan yılnıñ iyün’ ayı belän çağıştırğanda 1,3%qa (239,2 meñgä) artqan.

İldä xalıqnıň 10 million 358 meñe şähärlärdä, 7 million 656 meñe dä awıllarda yäşi.

 2017nçe yılnıñ ğinwar-may aylarında 155 meñ 4 bala dönyağa kilgän.

Bala tabu küläme uzğan yılnıñ şul uq çorına qarağanda 6,2%qa kimegän.

1 yäş’kä xätle bäbilär ülemnärendä isä uzğan yılğa qarağanda 16,8% külämendä kimü küzätelgän.

 

 

 



Bäyläneşle xäbärlär